अमेरिकी पूर्वराष्ट्रपति डोनाल्ड ट्रम्पले भारतको अहमदाबादमा भएको विमान दुर्घटनालाई उड्डयन इतिहासकै एक "भयावह" दुर्घटना भएको भन्दै गहिरो दु:ख व्यक्त गरेका छन्।

ह्वाइट हाउसमा आयोजित एक कार्यक्रमका क्रममा बोल्दै ट्रम्पले भने, "अहमदाबादमा भएको विमान दुर्घटना अत्यन्तै दर्दनाक छ। मैले भारतीय पक्षलाई भनिसकेको छु कि अमेरिकाले जुनसुकै प्रकारको सहयोग गर्न सक्दो प्रयास गर्नेछ। भारत बलियो देश हो, उनीहरूले यो संकट पार गर्नेछन्।"

उनका अनुसार, प्रारम्भिक जानकारीले धेरै मानिसहरूले ज्यान गुमाएको संकेत गर्छ। उनले भने, "हामी यो घटनाबाट निकै दुखित छौं। यस्तो दुर्घटना उड्डयन इतिहासमै दुर्भाग्यपूर्ण घटनामध्ये एक हो।"

एयर इन्डियाको लन्डन गन्तव्यको यात्रुवाहक विमान आज दिउँसो अहमदाबादबाट उडान भरेको केही समयमै आवासीय क्षेत्रमा दुर्घटनाग्रस्त भएको हो। भारतीय गृहमन्त्री अमित शाहका अनुसार विमानमा २३० यात्रु र १२ चालक दलका सदस्यसहित कुल २४२ जना सवार थिए।

विमान दुर्घटनाको कारणबारे प्रारम्भिक अनुसन्धान सुरु भइसकेको भारतीय अधिकारीहरूले जनाएका छन्।