इजरायलले इरानी राजधानी तेहरानको आकाशमा ‘पूर्ण हवाई सञ्चालन नियन्त्रण’ कायम रहेको दाबी गरेको छ । 

इजरायली वायु सेनाले आइतबार राति इरानमा थप आक्रमण गरेको बताएको छ भने इरानी सञ्चारमाध्यमले देशको पश्चिमी क्षेत्रमा सोमबार बिहान नयाँ आक्रमण भएको जनाएका छन् ।

इजरायलमाथि पनि इरानले आइतबार राति क्षेप्यास्त्र प्रहार गरेको थियो, जसका केही ‘आइरन डोम’ सुरक्षा प्रणालीलाई पार गर्दै लक्ष्यमा पुगेका थिए । 

बीबीसीका अनुसार, इजरायलका धेरै नागरिकले देशको हवाई सुरक्षा प्रणाली अभेद्य रहेको विश्वास गरेका थिए, तर अहिले त्यो विश्वासमा धक्का पुगेको छ । 

इरानी स्वास्थ्य मन्त्रालयका अनुसार शुक्रबारदेखि हालसम्म इजरायली आक्रमणका कारण कम्तीमा २२४ जनाको मृत्यु भएको छ । तर, इरान सरकारको प्रतिबन्धका कारण बीबीसीका पत्रकारहरूले देशभित्रैबाट स्वतन्त्र रूपमा रिपोर्टिङ गर्न नपाएका बताइएको छ । 

बीबीसी संवाददाता आजादेह मोशिरीले तेहरानका बासिन्दासँग सम्पर्क गरेकी छन् । तीमध्ये एक महिलाले भनेकी छन्, ‘म दुई दिनदेखि घरबाट निस्केकी छैन । आमा बूढी हुनुहुन्छ, उहाँलाई एक्लै छाड्न डर लाग्छ ।’