भारी वर्षाका कारण आएको बाढीका कारण पछिल्लो २४ घण्टामा पाकिस्तानको पञ्जाब प्रान्तमा ६३ जनाको मृत्यु भएको छ। 

बाढी पहिरोमा परेर ३०० जना घाइते पनि भएको पाकिस्तानी सञ्चार माध्यमहरूले जनाएका छन् । धेरैजसो मृत्यु लाहोर, फैसलाबाद, ओकारा, साहिवाल, पाकपट्टन र चकवालमा भएको छ । यी क्षेत्रहरूमा १२५ भन्दा बढी घरहरू क्षतिग्रस्त भएका छन् । 

पाकिस्तान मौसम विभागले पहिले नै देशभर मुसलधारे वर्षाको चेतावनी जारी गरिसकेको छ। रावलपिंडी, चकवाल र वरपरका क्षेत्रहरूमा भारी वर्षाका कारण नदीहरू उर्लिएका छन्।

नागरिकहरूलाई अनावश्यक यात्रा नगर्न र बिजुलीको तार आदिबाट टाढा रहन सल्लाह दिइएको छ। पानीको सतह निरन्तर बढ्दै गएका कारण रावलपिंडीको गवालमण्डी र कट्टारियन पुलहरूमा बाढीको चेतावनी जारी गरिएको छ। साथै, रावलपिंडीमा बिदा घोषणा गरिएको छ।