०४ साउन २०८३, सोमबार
चर्चित भारतीय क्रिकेटर रविचन्द्रन आश्विनले इन्डियन प्रिमियर लिग (आईपीएल) क्लब चेन्नई सुपर किङ्समाथि गम्भीर आरोप लगाएका छन् ।
उनले आईपीएलको पछिल्लो संस्करणमा चेन्नईले डेवाल्ड ब्रेविसलाई गोप्य रूपमा आवश्यकताभन्दा बढी पैसा दिएको आरोप लगाएका हुन् ।
दक्षिण अफ्रिकी खेलाडी डेवाल्ड ब्रेविसले आईपीएलको पछिल्लो संस्करण चेन्नई सुपर किङ्सबाट खेलेका थिए । ‘डेवाल्ड ब्रेविसलाई टोलीमा आबद्ध गर्न गोप्य रूपमा पैसाको लेनदेन गरिएको थियो,’ आश्विनले भनेका छन् ।
आईपीएल–२०२५ मा गुरजपनित सिंह घाइते भएपछि चेन्नईले उनको स्थानमा युवा खेलाडी ब्रेविसलाई टोलीमा आबद्ध गरेको थियो । त्यतिबेला चेन्नईले ब्रेविसका लागि दुई करोड २० लाख भारतीय रूपैयाँ खर्चिएको जनाएको थियो ।
तर, आश्विनले त्योभन्दा निकै बढी रकम गोप्य रूपमा लेनदेन भएको दाबी गरेका छन् । ‘अरु टोली पनि ब्रेविसलाई आबद्ध गर्न चाहन्थे । यसका लागि ब्रेविसको प्रतिनिधिले सबैसँग कुराकानी पनि गरेका थिए । तर, चेन्नईले गोप्य रूपमा थप पैसा दिने भएपछि सहमति जुटेको थियो,’ उनले भनेका छन् ।
रिप्लेसमेन्टका रूपमा कुनै टोलीमा आबद्ध हुने खेलाडीले पनि आईपीएलको नियमअनुसार, तोकिएको न्यूनतम् रकममात्र पाउने प्रावधान छ । ब्रेविसले चेन्नईबाट ६ खेल खेल्दै ३७.५० को औसतले कूल दुई सय २५ रन बनाएका थिए । उनले दुईवटा अर्धशतक पनि प्रहार गरेका थिए ।
