बुधवार पक्राउ परेका राष्ट्रिय स्वतन्त्र पार्टी (रास्वपा)का नेता अरनिको पाँडेले एक महिलालाई सामाजिक सञ्जालमा तथानाम गालीगलौज गरेको आरोप लागेको छ । आफूलाई पाण्डेले सामाजिक सञ्जालमार्फत चरित्रहत्या हुने गरी गालीगलौज गरेको भन्दै ती महिलाले उजुरी दिएको साइबर ब्युरोका एक अधिकारीले जानकारी दिए । 

उक्त उजुरी परेपछि ब्युरोले उनलाई छलफलका लागि  भोटाहिटीको कार्यालयमा बोलाएर नियन्त्रणमा लिएको हो । उनलाई बुधवार राति ब्युरोकै हिरासतमा राखिएको छ । 

पाण्डेले विगतदेखि केही समयदेखि नै ती महिलालाई सामाजिक सञ्जालमा तथानाम गालीगलौज गर्ने गरेको बताइएको छ । के विषयमा गालीगलौज गरेको भन्नेबारेचाहिँ प्रहरीले विस्तृतमा खुलाएको छैन । 

ब्युरोका प्रवक्ता एवं एसपी दीपक अवस्थीले पाण्डेलाई विद्युतीय अपराध कसुरमा अनुसन्धान गर्न नियन्त्रणमा लिइएको जानकारी दिए । उनलाई बिहीबार अदालतमा म्याद थपका लागि उपस्थित गराइने प्रहरीको भनाइ छ । 

बुधवार नै ब्युरोले एमाले नेता ऐन महरालाई समेत साइबर अपराधमै नियन्त्रणमा लिएको थियो । तर, उनी भने हाजिर जमानीमा रिहा भइसकेका छन् ।