तुलनात्मक रूपमा कमजोर प्रतिद्वन्द्वी रायो भालेकानोले स्पेनिस ला लिगाअन्तर्गतको खेलमा उत्कृष्ट पुनरागमन गर्दै साविक विजेता बार्सिलोनालाई बराबरीमा रोकेको छ । रायो भालेकानो र बार्सिलोनाबीचको खेल १–१ गोलको बराबरीमा सकिएको हो ।

जारी सिजनको ला लिगामा बार्सिलोनाले पहिलोपटक अंक बाँडेको हो । बार्सिलोना यसअघि लगातार दुई खेलमा विजयी भएको थियो । रायो भालेकानोको घरेलु मैदानमा खेलिएको उक्त खेलमा शुरूआती अग्रता बार्सिलोनाले लिएको थियो ।

निर्धारित समयको ४०औँ मिनेटमा बार्सिलोनाका लागि प्रतिभाशाली किशोर खेलाडी लामिन यामलले गोल गरेका थिए । १८ वर्षीय यामलले पेनाल्टीमार्फत् गोल गर्दै टोलीलाई अग्रता दिलाएका थिए । सोही गोलका कारण पहिलो हाफमा बार्सिलोना अगाडि रह्यो ।

तर, खेलको दोस्रो हाफमा रायो भालेकानोले जवाफी गोल फर्कायो । निर्धारित समयको ६७औँ मिनेटमा रायो भालेकानोका लागि फ्रान पेरेजले जवाफी गोल गरेका हुन् । उक्त खेलमा भिडियो असिस्टेन्ट रेफ्री (भीएआर) प्रविधिमा पनि समस्या देखिएको थियो ।

रायो भालेकानोका डिफेन्डर पेप चाभारियाले फल खेलेका कारण बार्सिलोनाले पेनाल्टी प्रहारको अवसर पाएको थियो । यसमा केही विवाद पनि देखिएको थियो । तर, भीएआर प्रविधिमा समस्या देखिएकाले त्यसको रिप्ले भने हेर्न सकिएन ।

जारी सिजनको ला लिगामा सबै टोलीले तीन–तीन खेल खेलिसक्दा रियल म्याड्रिड नौ अंकसहित तालिकाको पहिलो स्थानमा आसिन छ । समान अंक बटुलेको एथलेटिक क्लब दोस्रो र सात अंकसहित भिल्लारियल तेस्रो स्थानमा छन् ।

यसैगरी, सात अंक जोडेको बार्सिलोना चौथो स्थानमा आसिन छ । एक जित, एक बराबरी र एक हारको नतिजाबाट चार अंक जोडेको रायो भालेकानो तालिकाको १०औँ स्थानमा छ ।