०५ साउन २०८३, मंगलबार
शिक्षा तथा मानव स्रोत विकास केन्द्रले शैक्षिक सत्र २०८३ का लागि विद्यालयहरूमा सरकारद्वारा स्वीकृत पाठ्यपुस्तक र पाठ्यसामग्री मात्र प्रयोग गर्न निर्देशन दिएको छ ।
केन्द्रले ७७ वटै जिल्लाका शिक्षा विकास तथा समन्वय एकाइहरूलाई पत्राचार गर्दै स्वीकृत मापदण्ड विपरीतका सामग्री प्रयोग गर्नेमाथि निगरानी र कारबाही गर्न निर्देशन दिएको हो ।
शिक्षा तथा मानव स्रोत विकास केन्द्रका निर्देशक डा. श्याम प्रसाद आचार्यद्वारा जारी परिपत्रमा विद्यालय तहमा पाठ्यक्रम विकास केन्द्रले विकास गरेका र स्वीकृति प्रदान गरेका पाठ्यपुस्तक मात्र लागू गर्नुपर्ने कानुनी व्यवस्था रहेको स्मरण गराइएको छ ।
पाठ्यपुस्तकको पृष्ठ सङ्ख्या र मूल्य समेत पाठ्यक्रम विकास केन्द्रले तोकेको मापदण्ड अनुसार नै हुनुपर्ने नीतिगत व्यवस्था छ ।
पछिल्लो समय केही निजी प्रकाशनहरूले कानुनी व्यवस्थाको उल्लङ्घन गरी बढी मूल्य तोकिएका, न्यून गुणस्तरका कागज प्रयोग गरिएका र स्वीकृति नै नलिई पाठ्यपुस्तक तथा सामग्रीहरू बिक्री गरिरहेको गुनासो प्राप्त भएपछि केन्द्रले यस्तो कदम चालेको हो । कतिपय विद्यालयले मूल्य नै नतोकिएका सामग्रीहरू प्रयोगमा ल्याएको र अभिभावकलाई आर्थिक भार थपेको केन्द्रको ठहर छ ।
केन्द्रले जारी गरेको पत्रमा विद्यालयहरूबाटै पोशाक, पाठ्यपुस्तक र स्टेशनरी बिक्री–वितरण गर्ने कार्यलाई समेत अवैध मान्दै त्यस्ता गतिविधि रोक्न निर्देशन दिएको छ ।
