०५ साउन २०८३, मंगलबार
विश्व फुटबलकै इतिहासमा पहिलो पटक तीन वटा आयोजक राष्ट्रहरूले एकै साथ फिफा विश्वकप २०२६ को ऐतिहासिक शुरूआत गर्दै छन् । संयुक्त राज्य अमेरिका, मेक्सिको र क्यानडाले संयुक्त रूपमा आयोजना गरेको विश्वकपमा तीन छुट्टाछुट्टै उद्घाटन समारोहहरू आयोजना हुनेछन् ।
इतिहासकै सबैभन्दा ठुलो मानिएको विश्वकपमा कुल १६ वटा शहरहरूमा रेकर्ड १०४ खेलहरू खेलाइनेछन् । यो विश्वव्यापी खेल उत्सव मेक्सिकोमा नेपाली समयानुसार आज रातिबाट हुँदैछ । यो उत्सव जुलाई १९ मा न्युयोर्कमा हुने फाइनल खेलसँगै समापन हुनेछ ।
यसअघि अमेरिकाले सन् १९९४ मा र मेक्सिकोले सन् १९७० र १९८६ मा विश्वकप आयोजना गरिसकेका छन् । क्यानडाले भने आफ्नो इतिहासमा पहिलो पटक पुरुष विश्वकपको आतिथ्यता गर्दै छ ।
यस पटक मेक्सिको, क्यानडा र अमेरिकामा आयोजना हुने तीन वटै उद्घाटन समारोहहरू प्रत्येक देशको पहिलो खेल शुरू हुनभन्दा ठीक ९० मिनेट अगाडि शुरू हुनेछन् । पहिलो उद्घाटन समारोह मेक्सिकोको मेक्सिको सिटीमा बिहीबार जुन ११ मा स्थानीय समयअनुसार दिउँसो १२:३० बजे शुरू हुनेछ । यो समारोह मेक्सिको र दक्षिण अफ्रिकाबिचको खेलभन्दा ठीक अगाडि हुनेछ ।
दोस्रो उद्घाटन समारोह क्यानडाको टोरन्टोमा शुक्रबार जुन १२ मा दिउँसो १:३० बजे आयोजना गरिनेछ । यो क्यानडा र बोस्निया एन्ड हर्जगोभिनाबिचको खेलअघि हुनेछ ।
तेस्रो तथा अन्तिम उद्घाटन समारोह अमेरिकाको लस एन्जलसमा शुक्रबार जुन १२ मा बेलुका ७:३० बजे शुरू हुनेछ, जुन अमेरिका र पराग्वेबिचको खेलको ठीक अगाडि सञ्चालन हुनेछ ।
यी तीन वटै समारोहहरूको निर्माण र निर्देशन मार्को बालिचले गर्दै छन् । बालिचले यसै वर्षको शुरूमा सन् २०२६ को मिलान कोर्टिना विन्टर ओलम्पिकको उद्घाटन समारोहको सफल निर्देशन गरेका थिए । उनका अनुसार तीन वटै समारोहहरू एउटै साझा थिममा आधारित हुनेछन् । यसको मुख्य उद्देश्य फुटबलले कसरी मानिसहरूलाई सिमानाभन्दा माथि उठेर एकताबद्ध गर्छ भन्ने देखाउनु हो ।
फिफाका अध्यक्ष जियानी इन्फान्टिनोले मेक्सिको सिटी, टोरन्टो र लस एन्जलसबाट शुरू हुने यी समारोहहरूले संगीत, संस्कृति र फुटबललाई अनुपम ढङ्गले जोड्ने बताएका छन् । यसले प्रत्येक राष्ट्रको पहिचान र प्रतियोगिताको एकता दुवैलाई झल्काउने उनको भनाइ छ ।
प्रत्येक समारोहमा भाषण, झन्डाको परेड, खेलको आधिकारिक बल प्रदर्शन र साङ्गीतिक प्रस्तुतिहरू समावेश हुनेछन् । मेक्सिको सिटीको समारोह करिब १६ मिनेट ३० सेकेन्ड चल्नेछ भने टोरन्टो र लस एन्जलसका शोहरू करिब १३-१३ मिनेटका हुनेछन् ।
कलाकारहरूको प्रस्तुति सकिएपछि मैदान खेलाडीहरूको वार्म-अपका लागि हस्तान्तरण गरिनेछ । खेल शरू हुनुभन्दा २५ मिनेट अगाडि खेलाडीहरूको मार्चपास र आधिकारिक परिचयको प्रोटोकल शुरू हुनेछ ।
प्रत्येक आयोजक देशले उद्घाटन समारोहमा आफ्नो छुट्टै दृश्य शैली र सांस्कृतिक झलक प्रस्तुत गर्नेछन् । क्यानडाले आफ्नो बहुसांस्कृतिक मोजाइक (सांस्कृतिक विविधता) लाई प्रस्तुत गर्नेछ । मेक्सिकोले आफ्नो परम्परागत कला 'पापेल पिकाडो' (कागज काटेर बनाइने कला) प्रदर्शन गर्नेछ । अमेरिकाले भने चम्किलो र जाज्वल्यमान ट्रफीको थिमलाई प्रस्तुत गर्ने बालिचले बताएका छन् ।
मेक्सिको सिटीको एस्टाडियो एज्टेका रङ्गशालामा हुने पहिलो खेलमा मेक्सिको र दक्षिण अफ्रिका भिड्दै छन् । यो खेल सन् २०१० को विश्वकपको उद्घाटन खेलको पुनरावृत्ति पनि हो । यो समारोहलाई विशेष बनाउन मेक्सिको सिटीमा जुन ११ का दिन सार्वजनिक बिदा घोषणा गरिएको छ । विद्यालयहरू बन्द रहनेछन् भने रोजगारदाताहरूलाई घरबाटै काम (रिमोट वर्क) गर्न प्रोत्साहन गरिएको छ ।
रङ्गशाला क्षेत्रमा केवल टिकट भएका दर्शक र आधिकारिक सञ्चारकर्मीलाई मात्र प्रवेश दिइनेछ । क्यानडामा हुने खेल क्यानडाको पुरुष राष्ट्रिय टोलीका लागि ऐतिहासिक बन्नेछ, किनकि टोलीले पहिलो पटक आफ्नै घरेलु मैदानमा विश्वकप खेल खेल्दै छ । लस एन्जलसमा हुने खेलमा भने अमेरिकी टोलीले पराग्वेको सामना गर्नेछ ।
ल्याटिन संगीतकी आइकन शाकिरा र बर्न ब्वाईले विश्वकपको आधिकारिक गीत 'दाइ दाइ' गाउनेछन् । यसका साथै मेक्सिकन संस्कृतिको प्रतिनिधित्व गर्दै आदिवासी कलाकारहरू, आधुनिक लोक टोली र फिफा विश्वकपको आधिकारिक एल्बममा रहेका अलेजान्ड्रो फर्नान्डेज, बेलिन्डा, ड्यानी ओसियन, जे बाल्भिन, लिला डाउन्स, लस एन्जलस अजुलस, माना र दक्षिण अफ्रिकी गायिका टायलाले पनि स्टेज सेयर गर्नेछन् ।
क्यानडाको बीएमओ फिल्ड रङ्गशालामा आयोजना हुने समारोहमा प्रख्यात गायिका एलेनिस मोरिसिट मुख्य आकर्षकका रूपमा रहनेछिन् । उनलाई एलेसिया कारा, एलियाना, जेसी रेयेज, माइकल बुबले, नोरा फतेही, सञ्जय, वेगेड्रेम र विलियम प्रिन्स जस्ता कलाकारहरूले साथ दिनेछन् ।
अमेरिकाको सोफाइ रङ्गशालामा हुने तेस्रो समारोहको नेतृत्व पप स्टार केटी पेरीले गर्नेछन् । उनीसँगै स्टेजमा लिसा, रेमा, अनिट्टा र फ्युचर जस्ता चर्चित अन्तर्राष्ट्रिय कलाकारहरू देखिनेछन् ।
यस विश्वकपमा परम्परागत रूपमा गरिने क्लोजिङ सेरेमनी अर्थात् समापन समारोह हुने छैन । तर, त्यसको सट्टामा जुलाई १९ आइतबारका दिन न्यू जर्सीको मेटलाइफ रङ्गशालामा हुने फाइनल खेलको बिचमा भव्य 'हाफटाइम शो' आयोजना गरिनेछ ।
इतिहासमै पहिलो पटक हुन लागेको फाइनलको हाफटाइम शोमा पप क्वीन मडोना, विश्वप्रसिद्ध के-पप ब्यान्ड बीटीएस र शाकिरा जस्ता मेगास्टारहरूले विशेष अतिथि कलाकारहरूका साथ प्रदर्शन गर्नेछन् ।
