काठमाडौं, ११ माघ — अमेरिकामा एक व्यक्तिले इ–सिगरेट पिउँदै गर्दा मुखैमा पड्केको छ । यसरी विस्फोट भएपछि ती व्यक्तिको सातवटा दाँत फुटेका छन् ।
उनको हालत खराब भएपछि अस्पतालमा भर्ना गरियो ।
बेलायती अखबार द सनका अनुसार अमेरिकाको आइडाहोको पोक्याटेल्लोमा बस्ने एन्ड्रु हलको मुखैमा सिगरेट पड्कियो । इ–सिगरेटको भ्याप प्यान पड्केपछि उनको सातवटा दाँत भाँचिए । अनि मुखमा अनेकथरी चोट लाग्यो ।
एन्ड्रु हलले आफैं यसको बारेमा फेसबूक पेजमा सूचना दिएका हुन् । अरूहरू पनि यसमा सचेत हुन् भनेर उनले तस्वीर सार्वजनिक गरेका हुन् ।
गत शनिवार उक्त इ–सिगरेट उनको मुखमा पड्केको थियो । चुरोटका तुलनामा इ–सिगरेट धेरै खतरनाक हुन्छन् । यसबाट क्यान्सर पनि छिट्टै लाग्छ । तैपनि मान्छेहरू यो पिउन तानिबस्छन् ।
एजेन्सी
