काठमाडौं, २८ माघ– आइसिसी वर्ल्ड क्रिकेट लिग डिभिज टू अन्तर्गत आफ्नो तेस्रो खेलमा नेपालले आइतबार युएईसँग प्रतिस्पर्धा गर्दैछ । खेल नेपाली समय अनुसार दिउँसो सवा १ बजे हुनेछ । 

नामिबियामा जारी प्रतियोगितामा नेपालले यसअघिका दुई खेलमा एकमा जित र एकमा हारको नतिजा निकालेको छ । नेपालले पहिलो खेलमा नामिबियालाई एक विकेटले हराएको थियो भने दोस्रो खेलमा ओमानसँग ६ विकेटले पराजित भएको थियो ।

युएईले पनि दुई खेलमा एकमा जित र एकमा हारको नजिता निकालेको छ । दुवै एसियाका टोली भएकाले लामो समयदेखि एकअर्कासँग परिचित छन् । केही महिनाअघि आइसिसी वर्ल्ड क्रिकेट लिग च्याम्पियनसिप अन्तर्गत यी दुुई टोलीबिच भएको दुई खेलमा दुवै युएईले जितेको थियो ।