धनगढी, २७ फागुन– बोक्सी आरोपमा निर्घाट कुटिएकी राधा चौधरीलाई सेती अञ्चल अस्पतालमा बस्ने वातावरण नभएपछि अहिले उनलाई सेफ हाउसमा पुर्याइएको छ ।

दैनिक २४ औं घण्टा मिडिया, गैरसरकारी संघ–संस्थाकका प्रतिनिधिले सोध्ने एउटै किसिमको प्रश्न र जिज्ञासाले आतंकित भएकी राधालाई ओरेक नेपालको सेफ हाउसमा पुर्याइएको हो ।

राधाकी दिदी सन्ध्या योगीले भनिन्, ‘कृपया यसलाई बचाउनुस्, दिनरात यस (राधा)लाई मिडिया र एनजीओकर्मीको एउटै प्रश्न छ, घटना कसरी घट्यो ?, के–के गरे तिमिलाई ?, बस् यहि सवालमा अन्तरवार्ता दिनु परेको छ ।’

सन्ध्याका अनुसार उनलाई सेती अञ्चल अस्पताल पुर्याइसकेपछि दैनिक हजारौं मान्छेले भेटेर एउटै प्रश्न सोध्ने गरेका छन् । कोही सहानुभुती देखाउन पुगेका छन् भने, कोही सहयोगको बाचासहित अस्पताल पुगिरहेका छन् । तर भीड नियन्त्रणमा नआएपछि उनका आफन्तजनलाई समेत सास्ती पुगेको छ । यहाँसम्मकी अस्पतालमा उपचाररत अन्य बिरामीहरुलाई समेत असर पुगेको एक जना चिकित्सकले बताइन् ।

ओरेक नेपाल कैलालीकी कार्यक्रम संयोजक बिनु रानाले पीडितको संवेदनशिलतालाई मध्यनजर गरी पीडित पक्षको सहमतिमा सेफ हाउसमा लगेको जानकारी दिइन् ।

घटनाका मुख्य अभियुक्त तथा तान्त्रिक रामबहादुर चौधरी (भोले), उनको सहयोगी किस्मती चौधरी र स्मारिका चौधरी अहिले हिरासतमा छन् । उनीहरुविरुद्ध बोक्सी आरोप सम्बन्धी कसुर तथा सजाय ऐन र ज्यान मार्ने उद्योग अनुसार मुद्धा दर्ता भएको कैलालीका प्रहरी प्रवक्ता डिएसपी सागर बोहराले बताए ।