काठमाडौं, २६ चैत– भारतको तीनदिने राजकीय भ्रमण सकेर स्वदेश फर्किएका प्रधानमन्त्री केपी शर्मा ओलीले अब भारतसँगको सम्बन्ध सबैका लागि सुध्रिएको बताएका छन् । त्रिभुवन अन्तर्राष्ट्रिय विमानस्थलको अति विशिष्ट कक्षमा सञ्चारकर्मीसँगको कुराकानीमा प्रधानमन्त्री ओलीले आफ्नो भ्रमणले भारतसँगको सम्बन्ध थप समधुर बनेको र अब सधैंका लागि सुध्रिएको बताए । 

‘नेपाल भारतको सम्बन्धमा अब तस्बिर आफैं बोल्छ,’ ओलीले भने, ‘अब भारतसँगको सम्बन्ध कसैले बिगारेन भने सुध्रिदै जान्छ । हामी भारतसँगको सम्बन्ध बिगार्ने पक्षमा छैनौं ।’ प्रधानमन्त्री ओलीले आफ्नो भारत भ्रमणका क्रममा महत्वपूर्ण र केही नयाँ सम्झौता भएको पनि बताए । सडक, रेल र जलमार्ग बिस्तार गर्ने विषयमा भारतीय पक्षसँग महत्वपूर्ण सहमति तथा समझदारी भएको प्रधानमन्त्री ओलीको भनाइ थियो । 

प्रधानमन्त्री ओलीले आफ्नो भ्रमणले भारतसँग मित्रवत् सम्बन्ध विकसित भएको पनि दावी गरे । ‘भारतका प्रधानमन्त्री नरेन्द्र मोदीजीले मित्रवत र एक–अर्काको अस्तित्व स्वीकार गर्ने खालको सम्बन्ध विकास गर्ने हाम्रो प्रयासलाई सकरात्मक रुपमा स्वीकार गर्नुभएको छ,’ ओलीले भने, ‘म जुन अभिमत बोकेर भ्रमणमा गएको थिए, त्यसलाई भारतले स्वागत गरेको छ ।’

सीमासम्बन्धी विवाद तथा अन्य विवादका विषयमा पनि आफूले भारतीय समकक्षीसँग गम्भीरतापूर्वक कुरा उठाएको ओलीले बताए । 

यस्तै पञ्चेश्वर र टकनकपुरका सम्बन्धमा पनि आफूले भारतीय प्रधानमन्त्रीको ध्यानाकर्षण गराएको ओलीले बताए । पञ्चेश्वरमा र टनकपुरमा देखिएको समस्या समाधानका लागि भारतीय प्रधानमन्त्री मोदीले आफू दिल्लीमा हुँदा नै मातहतका निकायलाई निर्देशन दिइसकेको ओलीले बताए ।

स्थानीय तहमा समाहित हुन कर्मचारीलाई मन्त्रालयको निर्देशन– संघीय मामिला तथा सामान्य प्रशासन मन्त्रालयले सबै जिल्ला समन्वय समितिमा कार्यरत रहेका कर्मचारीलाई स्थानीय तहमा समाहित हुन सामान्य प्रशासन मन्त्रालयले निर्देशन दिएको छ । मन्त्रालयले प्रेस विज्ञप्ति जारी गर्दै स्थानीय तहमा कर्मचारीको अभाव भएपछि समन्वय समितिको कर्मचारी सिधै स्थानीय तहमा समायोजन गर्न लागेको जानकारी दिएको छ ।  

स्थानीय शासन सञ्चालन ऐन, २०७४ को दफा ८५ (३) १ मा स्थानीय तहमा कार्यरत कर्मचारीहरु सम्बन्धित स्थानीय तहमा स्वतः समायोजन भएको मानिने व्यवस्था भएको तथा जिल्ला समन्वय समितिका कर्मचारीलाई सम्बन्धित जिल्लाको स्थानीय तहमा खटाउन सकिने व्यवस्था रहेको छ । यसरी कर्मचारी खटाउँदा पर्याप्त कर्मचारी नभएका गाउँपालिका र नगरपालिकामा प्राथमिकता दिइने पनि विज्ञप्तिमा भनिएको छ । 

प्रदेश ५ को नीति कार्यक्रम– प्रदेश नं ५ को सरकारले प्रदेशको समृद्धिका लागि कृषि, उद्योग र पर्यटनका माध्यमबाट समग्र आर्थिक सामाजिक विकासको रणनीति अवलम्बन गर्ने नीति अगाडि सारेको छ । प्रदेश सरकार योजनाबद्ध रुपमा विकास र समृद्धिको लक्ष्य हासिल गर्ने दिशामा अघि बढ्न संकल्पित रहेको समेत प्रतिबद्धता जनाइएको छ । 

प्रदेश सरकारका तर्फबाट आइतबार प्रदेशसभामा प्रदेश प्रमुख उमाकान्त झाले प्रस्तुत गरेको सरकारको नीति, कार्यक्रममा सरकारले प्रादेशिक विकासको अवधारणा तयार गरी योजनाबद्ध विकासको बाटोमा अघि बढ्ने नीतिअन्तर्गत अल्पकालीन, मध्यकालीन र दीर्घकालीन योजना तर्जुमा गर्ने कुरालाई उच्च प्राथमिकता दिइने जनाइएको छ ।

सरकारले सरकारी, निजी र सहकारी क्षेत्रका माध्यमबाट प्रदेशको आर्थिक विकास गर्ने नीति अगाडि सारेको छ । यसका साथै प्रदेशको विकासमा स्वदेशी र विदेशी पूँजी लगानीलाई आकर्षित गर्ने नीति अवलम्बन गर्दै प्रदेशको विकास र समृद्धिका लागि आगामी आवमा सञ्चालन गर्न सकिने सम्भाव्य आयोजनाको पहिचान र सम्भाव्यता अध्ययनमा जोड दिइनेछ ।

दुर्घटनामा चारको मृत्यु– संखुवासभाको चैनपुर नगरपालिका–२ को सल्लेरीमा आइतबार दिउँसो को २ त ५८०५ नंं ट्याक्टर दुर्घटना हुँदा तीनजनाको मृत्यु भएको छ । मृत्यु हुनेमा मादी नगरपालिका–७ का टंक  पौडेल, हर्कबहादुर राई र राजेन्द्र राई  रहेको इलाका प्रहरी कार्यालय चैनपुरले जनाएको छ । 

यसैगरी चिचिला गाउँपालिकास्थित भित्री सडकमा ट्याक्टर चढ्ने क्रममा लडेर चिचिला–४ का ५७ वर्षीय कृृष्णबहादुर थापाको मृत्यु भएको छ । 

प्रदेश संसद् बैठकमा दुईवटा विधेयक पारित– प्रदेश नं. ३ को प्रदेश संसदको प्रथम अधिवेशनको ११ औँ बैठकले दुईवटा विधेयक पारित गरेको छ भने चारवटा विधेयकमाथि छलफल भएको छ । आइतबार अपराह्न बसेको प्रदेशसभा बैठकले प्रदेशस्तरका केही सार्वजनिक लिखत प्रमाणीकरण सम्बन्धमा व्यवस्था गर्न बनेको विधेयक र प्रदेश सरकारको आर्थिक कार्यविधि नियमित तथा व्यवस्थित गर्न बनेको विधेयक पारित गरेको हो ।

त्यसैगरी, ११ औं बैठकमा मुख्यमन्त्री डोरमणि पौडेलले गाउँ, नगर, जिल्ला सभा सञ्चालन कार्यविधि सम्बन्धमा व्यवस्था गर्न बनेको विधेयक, मुख्यमन्त्री तथा मन्त्रीको पारिश्रमिक तथा सुबिधा सम्बन्धमा व्यवस्था गर्न बनेको विधेयक र स्थानीय तहका पदाधिकारी र सदस्यहरूले पाउने सुविधाको सम्बन्धमा व्यवस्था गर्न बनेको विधेयक गरी तीनवटा विधेयक संसदमा प्रस्तुत गरे ।

त्यस्तै, आन्तरिक मामिला तथा कानुनमन्त्री शालिकराम जम्मकट्टेलले प्रदेशसभाका पदाधिकारी तथा सदस्यहरूको पारिश्रमिक तथा सुबिधा सम्बन्धमा व्यवस्था गर्न बनेको विधेयक प्रस्तुत गरे ।

आर्थिक कार्यविधिसम्बन्धी विधेयक पारित– प्रदेश नं ७ को प्रदेशसभाको आइतबार बसेको बैठकले प्रदेश सरकारको आर्थिक कार्यविधि नियमित तथा व्यवस्थित गर्न बनेको विधेयक, २०७४ लाई पारित गरेको छ । विधायन तथा प्रदेश मामिला समितिले दिएका सुझावलाई समावेश गरेर उक्त विधेयक पारित गरिएको हो । 

प्रदेश सरकार आर्थिक मामिला तथा योजना मन्त्री झपटबहादुर बोहराले विधायन तथा प्रदेश मामिला समितिबाट सुझावसहित पेश हुन आएको उक्त विधेयक पारित गरियोस् भन्ने प्रस्ताव बैठकमा प्रस्तुत गरेका थिए । प्रस्तुत विधेयकमाथि भएको छलफलपछि बैठकमा निर्णयार्थ पेश हुँदा सर्वसम्मतिले पारित भएको हो ।  

श्रीनिवासमाथि आक्रमण गरेको आशंकामा दुई पक्राउ– प्रहरीले बालसन्त श्रीनिवास आचार्यलाई गोली प्रहार गरेको आशंकामा दुई जनालाई पक्राउ गरेको छ । विराटनगर महानगरपालिका–१४ बाट पक्राउमा परेका ती दुई जनासँग सोधपुछ भइरहेकाले नाम गोप्य राखिएको प्रहरीले जनाएको छ । 

विराटनगर–१४ स्थित जतुवामा आइतबारराति १ः४५ बजे शौचका लागि कोठाबाट बाहिर निस्कनासाथ आचार्यमाथि गोली प्रहार भएको थियो । दाहिने कुममा गोली लागेको उनको विराटनगरको न्यूरो अस्पतालमा उपचार भइरहेको छ ।

गणेश लामाविरुद्ध मुद्दा दायर– जिल्ला सरकारी वकिलको कार्यालयक काठमाडौंले गुन्डा नाइके गणेश लामाविरुद्ध मुद्दा दायर गरेको छ । एक वर्ष कैद ५ लाख रुपैयाँ जरिवानाको माग गरी आइतबार जिल्ला प्रशासन कार्यालय काठमाडौंमा लामाविरुद्ध मुद्दा दायर भएको हो । 

हातहतियार तथा खरखजना मुद्दामा उनलाई अधिकतम सजायको माग गरिएको छ । गत फागुन ३० गते गौशलाको पिंगलास्थानस्थित पशुपती भिजन अगाडिबाट उनी ६ राउन्ड गोली र पेस्तोलसहित पक्राउ परेका थिए । 

अत्तरिया प्लेअफमा– पारस खड्का नेतृत्वको विराटनगर किंग्सलाई ६ विकेटले हराउँदै कैलालीको सीवाइसी अत्तरिया धनगढी प्रिमियर लिग (डीपीएल)को प्लेअफमा पुगेको छ । वर्षाका कारण ६ ओभरमा घटाइएको खेलमा विराटनगर किंग्सले दिएको ५६ रनको लक्ष्य सीवाइसी अत्तरियाले २ बल बाँकी छँदा ४ विकेट गुमाएर भेट्टायो ।

खेल हारेपछि पारस खड्का नेतृत्वको विराटनगर किंग्स डीपीएलको समूह चरणबाटै बाहिरिएको छ । पहिले ब्याटिङ गरेको विराटनगरले निर्धारित ६ ओभरमा ३ विकेट गुमाएर ५५ रन बनाएको थियो । 
डीपीएलमा यसअघि नै काठमाडौं गोल्डेन्स, टिम चौराहा, महेन्द्रनगर युनाइटेड प्लेअफमा पुगिसकेका छन् ।