काठमाडौं, २० वैशाख– नयाँ शक्ति पार्टी नेपालका संयोजक एवम् पूर्वप्रधानमन्त्री डा. बाबुराम भट्टराईले डा. उपेन्द्र देवकोटालाई भेटेपछि फेसबुकमा भावुक स्टाटस लेखेका छन् ।

डा. देवकोटालाई भेट्न बाबुराम बिहीवार अपराह्न बाँसबारीस्थित न्यूरो अस्पताल पुगेका थिए । अस्पतालबाट फर्किएपछि उनले डा. देवकोटासँगका पुराना तस्वीरहरूसहित लेखेका छन्, "मेरा बालसखा, सहपाठी तथा आत्मीय मित्र डा. उपेन्द्र देवकोटाको स्वास्थ्य स्थितिबारे बुझ्न अस्पताल पुग्दा दुवैले पुराना दिनहरूको सुखद् सम्झना गर्‍यौं । उहाँको तीक्ष्ण स्मरण शक्ति र दृढ अठोट यथावत् देख्दा उहाँ सोचेजति गम्भीर बिरामी भएको अनुभूति भएन र उहाँ आफैँले आफ्नो जीवनको सीमाको फरक आंकलन गरे पनि प्रकृतिमा हुने आकस्मिकता र सम्भावनाका नियमहरूले उहाँ स्वस्थ हुनुहुनेछ भन्ने आशा पलाइरह्यो ।
‘गेट वेल सून माइ फ्रेन्ड, अल योर क्लासमेट आर प्राउड अफ यु !’ (शीघ्र स्वास्थ्यलाभको कामना मेरो साथी, सबै सहपाठीलाई तिमीमाथि गर्व छ ।)"

भट्टराईले देवकोटासँग करीब २० मिनेट भलाकुसारी गरेका थिए ।