काठमाडौं, २७ वैशाख– मलेशियामा भएको आम चुनावमा पूर्व प्रधानमन्त्री महाथिर मोहम्मद नेतृत्वको विपक्षी गठबन्धनले ऐतिहासिक जित निकालेको छ । मलेशियाका पूर्व प्रधानमन्त्री महाथिर मोहमदले सन् १९५७ देखि निरन्तर सत्तामा रहेको दललाई आम चुनावमा हराउँदै सानदार राजनीतिक पुनरागमन गरेका छन् ।

९२ वर्षका डाक्टर महाथिरले कुनै समयमा वर्षौ आफूले नेतृत्व गरेको बारिसन नाशिओनल पार्टी र आँफैले हुर्काएका नेता नजिब रजाकलाई चुनौती दिन राजनीतिबाट अवकाश लिने निर्णय फिर्ता लिएका थिए ।

महाथिर नेतृत्वको गठबन्धनले गएको ६० वर्षदेखि सत्तामा रहेको बारिसन नेशनल (बिएन) गठबन्धनलाई हराएको हो ।

महाथिर नेतृत्वको विपक्षी गठबन्धनले ११५ सिट जितेको निर्वाचन आयोगले जनाएको छ । सरकार बनाउनका लागि ११२ सिटमा जित निकाले पुग्ने थियो ।

प्रधानमन्त्री नजिबको कार्यकाललाई लामो समयदेखिका भ्रष्टाचारका आरोपले छायाँमा परिदिएको थियो । यसको फाइदा विपक्षी गठबन्धनले उठाएको छ । 

आफ्नो ऐतिहासिक पराजयबारे उनले सार्वजनिक रुपमा प्रतिक्रिया दिइसेकेका छैनन् । तर डाक्टर महाथिरको बिहीवार सपथग्रहण हुने अपेक्षा गरिएको छ ।