काठमाडौं, १० जेठ– नवगठित नेपाल कम्युनिष्ट पार्टीको केन्द्रीय समितिको पहिलो बैठक प्रधानमन्त्री निवास बालुवाटारमा बसेको छ । 

बिहिबार साँझ करीब तीन घण्टा बसेको केन्द्रीय कमिटी बैठकमा मनोनयन गरिएका केन्द्रीय समितिका सदस्यहरुको सपथका साथै एकआपसमा सामान्य परिचय भएको थियो । 

नवनियुक्त केन्द्रीय सदस्यहरुलाई पार्टी अध्यक्ष प्रचण्डले सपथ खुवाएका थिए भने अर्का अध्यक्ष तथा प्रधानमन्त्री केपी शर्मा ओलीले  निर्देशनात्मक मन्तब्य राखेका थिए । 

आफ्नो मन्तब्यका क्रममा प्रधानमन्त्री ओलीले  आर्थिक समृद्धि र जनताको हित हुनेगरी काम गर्न  निर्देशन दिएको एक केन्द्रीय सदस्यले जानकारी दिए । 
 

बैठकमा सहभागि हुने केन्द्रीय सदस्यहरु पार्टीको सर्कुलरअनुसार सक्कल नागरिकता र त्यसको फोटोकपी लिएर बालुवाटार पुगेको पनि ती  केन्द्रीय सदस्यले जानकारी दिए । 

निर्वाचन आयोगमा दल दताए प्रयोजनका निमित्त पार्टीलाई सक्कल नागरिकता बमोजिम फोटोकपि बुझाइएको उनको भनाई छ । 

नेकपाले ४४१ सदस्सीय केन्द्रीय समिति बनाएपनि आजको बैठकमा सबैको सहभागिता  नरहेको बताइएको छ ।  एक साताअघि तत्कालिन एमाले र माओवादी केन्द्रबीच एकता भएर नेकपा बनेको हो । सो पार्टीले निर्वाचन आयोगमा दल दर्ताका लागि निवेदन दिएपनि  आधिकारिता भने पाउन बाँकी रहेको छ ।