०९ असार २०८३, मंगलबार
काठमाडौं, २७ जेठ – रुसमा बिहीवारदेखि शुरू हुने फूटबल विश्वकपमा ३२ देशले भाग लिइरहेका छन् । तीमध्ये इंग्ल्यान्ड मात्र यस्तो टीम हो जसका सबै २३ खेलाडी आफ्नो देशका क्लबहरू अर्थात् इंग्लिश प्रिमियर लीगमा खेल्छन् ।
बाँकी ३१ टीमका धेरै खेलाडी विदेशी क्लबमा खेल्छन् ।
सेनेगल र स्विडेन टीमका कुनै पनि फूटबल खेलाडी आफ्नो देशको क्लबमा खेल्दैनन् । स्विट्जरल्यान्ड, आइसल्यान्ड, नाइजेरिया र बेल्जियमको टोलीमा एक खेलाडी मात्र आफ्नो देशको क्लबमा आबद्ध छन् ।
यो विश्वकपमा ३२ देशका ७३६ खेलाडीले भाग लिइरहेका छन् । तीमध्ये कुल २०९ अर्थात् २८ प्रतिशत आफ्नो देशको क्लबबाट खेल्छन् । बाँकी ७२ प्रतिशत विदेशी क्लबबाट खेल्छन् ।
स्वदेशी क्लबबाट खेल्ने धेरै खेलाडीको सूचीमा इंग्ल्यान्डपछि रुसको नाम आउँछ । रुसको टीममा २३ मध्ये २१ खेलाडी आफ्नो देशको क्लबबाट खेल्छन् ।
स्पेन र साउदी अरब पनि रुसनजिकै छन् । साउदीको फूटबल टीमका २० र स्पेनका १९ खेलाडी आआफ्नो देशको क्लबबाट खेल्छन् ।
इंग्ल्यान्डको क्लब म्यानचेस्टर सिटीका सबभन्दा धेरै १६ खेलाडी यसपालि विश्वकपमा खेल्छन् । त्यसपछि स्पेनको रियल मड्रिड क्लबका १५ फूटबलर विश्वकपमा आआफ्नो देशको प्रतिनिधित्व गर्दैछन् । अर्को स्पेनी क्लब बार्सिलोनाका १४ खेलाडीले विश्वकपमा भाग लिइरहेका छन् ।
इटलीको युभेन्टसका ११ खेलाडी विश्वकपमा भाग लिँदैछन् जबकि इटली नै विश्वकपमा छनोट हुन सकेन ।
इंग्ल्यान्ड टीममा कप्तान ह्यारी केन समेत टोटेनह्याम हटस्परका पाँच खेलाडी छन् । त्यसपछि म्यानचेस्टर सिटी र म्यानचेस्टर युनाइटेडका चार चारजना खेलाडी छन् ।
एजेन्सी
