०१ असार २०८३, सोमबार
जेरूसेलम-छली र विश्वास घात गरेको आरोप लागेकी इजरायली प्रधानमन्त्री बेन्जामिन नेतन्याहुकी धर्मपत्नी साराको मुद्दामाथिको सुनुवाई आगामी तीन महिनाका लागि स्थगित भएको अदालत प्रशासनले सोमबार जनाएको छ ।
यस पहिले यही जुलाई १९ मा हुनेगरी ‘जेरुसेलम मेजिस्ट्रेट कोर्ट’ द्वारा तोकिएको सारा नेतन्याहुको सुनुवाई आगामी अक्टुबर ७ मा हुने उक्त अदालतले सञ्चारकर्मीलाई बताएको छ ।
मुद्दाबारे विस्तृत विवरण नदिइकन न्यायाधिश अभिताल चेनले मुद्दामाथिको सुनुवाईलाई ढिलो गर्न स्वीकृति प्रदान गर्नुभएको इजरायली न्यायाधिवक्ताको कार्यालय र प्रधानमन्त्रीका धर्मपत्नी साराका कानूनी प्रतिनिधिले बताउनुभयो ।
प्रधानमन्त्रीको सरकारी निवासमा खाना बनाउने कामदार उपलब्ध नभएको बताउँदै राज्य कोषको दुरूपयोग गरी एक लाख अमेरिकी डलरको खाना खरिद गरेको आरोपमा उनान्साठी वर्षीय सारामाथि गत महिना मुद्दा दायर भएको थियो ।
सन् २०१० देखि २०१३ सम्म नेतन्याहु, उहाँको परिवार र पाहुनाहरूका लागि भनी तीन लाख ५९ हजार सेकेल्स (इजरायली मुद्रा) बराबरको खाना खरिद गरेको नक्कली बिल पेश गरेको आरोप छ ।
नेतन्याहुले भने उक्त आरोपको खण्डन गर्दै आफूबाट कुनै छली नभएको बताउँदै आउनुभएको छ ।
प्रधानमन्त्रीले पनि आरोपलाई ‘अनर्गल’को आरोप भनी प्रतिक्रिया दिँदै आउनुभएको छ । यद्यपि प्रधानमन्त्री नेतन्याहुमाथि पनि विविध विषयमा भ्रष्टाचार गरेको आरोपहरू भित्रभित्र लगाइने गरेको छ ।
