काठमाडौं– बिमस्टेक सम्मेलनका कारण बिहीवार(आज) राजधानीको सवारी व्यवस्थापन अस्तव्यस्त बनेको छ ।

विहानैदेखि राजधानी काठमाडौंको ट्राफिक व्यवस्थापन अस्तव्यस्त बनेको हो ।  बिमस्टेकमा सहभागी हुन भारतका प्रधानमन्त्री नरेन्द्र मोदी, बंगलादेशकी प्रधानमन्त्री शेख हसिना र थाइल्याण्डका प्रधानमन्त्री प्रयुत चान्ओचा विहान काठमाडौंमा अवतरण गरेसँगै काठमाडौंको ट्राफिक व्यवस्थापन अस्तव्यस्त बनेको हो ।

रिंगरोड भित्रने अधिकांश चोकबाट सवारी फिर्ता भएका छन् ।  जसका कारण भित्री गल्लीहरु मा पनि जाम परेको छ  ।

बिमस्टेकमा सहभागी हुन म्यानमारका राष्ट्रपति विन मिन्ट मंगलबार काठमाडौं आएका थिए भने भुटानका प्रधानन्यायाधीश छिरिङ वाङचुक, श्रीलंकाका राष्ट्रपति मैत्रीपाला सिरिसेना बुधबार(हिजो) नेपाल आएका थिए ।  

विदेशी पाहुनाको सम्मानमा केही बेरमा राष्ट्रपति विद्यादेवी भण्डारीले दिवा भोज दिने कार्यतालिका रहेका कारण कालिमाटीदेखी शितलनीवास सम्मको रुट बन्द हुने ट्राफिक प्रहरीले जनाएको छ । 

 ट्राफिक प्रहरीका अनुसार सोल्टी होटेल , सोल्टी मोड , कालिमाटी , त्रिपुरेश्वर , नागस्थान , गोश्वारा हुलाक , महांकाल , भोटाहिटी , जमल , केशरमहल , लैनचौर , ग्याङजोङ होटल ,पानीपोखरी , शितल निवास हुँदै चल्ने सवारी साधनहरु दुइतर्फी रुपमै प्रभावित हुनेछन्  । 

उक्त रुटमा सवार गर्ने सवारी चालकलाई वैकल्पिक मार्गको प्रयोग गर्नहुन ट्राफिक प्रहरीले अनुरोध गरेको छ ।  

ट्राफिक व्यवस्थापनलाई सहज गर्न भन्दै सरकारले उपत्यकामा सवारी साधनमा जोर विजोर लागू गरेको छ ।  आज जोर अंकका सवारी साधनमात्र चल्न पाउनेछन् । 

त्यस्तै शैक्षिक संस्थाहरु पनि दुई दिनको लागि बन्द गरिएका छन् । 

बिमस्टेक सम्मेलन आज र भोलि दुई दिन चल्ने छ । 

तस्वीर-मुकुन्द कालिकोटे