२३ असार २०८३, मंगलबार
धनगढी – मुलुकको अन्य क्षेत्रमा जस्तै प्रदेश नं. ७ का स्वास्थ्य संस्थामा पनि बहिरंग सेवा (ओपीडी) ठप्प भएको छ ।
मुलुकी अपराध संहितामा गरिएको व्यवस्था खारेजीको माग गर्दै आन्दोलित चिकित्सकहरूले प्रदेशस्थित स्वास्थ्य संस्थाका आकस्मिक बाहेकका सेवाहरू ठप्प पारेका हुन् ।
सेवा ठप्प भएपछि सेती अञ्चल अस्पतालसहितका अस्पतालमा उपचारका लागि पुगेका बिरामी समस्यामा परेका छन् ।
भदौ १ गतेदेखि लागू भएको मुलुकी अपराध संहिताको दफा २३०, २३१, २३२ र २४० लाई संशोधन गर्न माग गर्दै चिकित्सकहरूले नेपाल चिकित्सक संघको अगुवाइमा आन्दोलन थालेका हुन् ।
संघका प्रदेश–७ सचिव प्रदीप मिश्रले केन्द्रीय कार्यक्रम अनुसार ठप्प पारिएको जानकारी दिए ।
उनले सरकारले निजी मेडिकल संस्था बन्द गराउने मनसायले नयाँ मुलुकी ऐनमा कडा व्यवस्था गरेकोले विरोध स्वरूप आन्दोलित हुनु परेको बताए ।
मुलुकी अपराध संहिता संशोधन नगरे थप कडा आन्दोलन गर्ने उनको चेतावनी छ ।
