काठमाडौं– काठमाडौं महानगरपालिका २७ ज्याथामा रहेको हिमालयन टे«किङ ग्यास स्टोरमा आगलागी भएको छ । मंगलबार बिहान करिब ४ः२५ बजे आगलागी भएको प्रहरी परिसर काठमाडौंले जनाएको छ । आगलागीमा परि पाँचजना घाइते भएका छन् । 

सुनिलमान स्थापितको ६ तले घरमा आगलागी भएको हो । दोलखाका पेमा दोर्जे लामाले स्थापितको घर भाडामा लिएर ग्यास स्टोर संचालन गरेका थिए । आगलागीबाट ८० थान ग्यास सिलिन्डरमा क्षति पुगेको छ । भरेका ३० थान र खाली ५० थान ग्यास सिलिन्डरमा क्षति पुगेको हो ।

केहि ग्यास सिलिन्डर पड्किएका छन् । स्थानीयले पड्किएको आवाज सुनेको बताएका छन् । महानगरीय आयुक्तको कार्यालय रानीपोखरीका अनुसार आगो लागेपछि हिमाल आरोहणका क्रममा प्रयोग गरिने अक्सिजन ग्यास सिलिन्डर विस्फोट हुँदा ज्याथा र क्षेत्रपाटी क्षेत्रका बासिन्दा भागाभाग भएका थिए ।

आगलागीका क्रममा भाग्न खोज्दा केही स्थानीयबासी लडेर घाइते भएका हुन् । आगो लागेपछि झ्यालबाट हामफालेर भाग्ने क्रममा घाइते भएका २ जनालाई उपचारका लागि अस्पताल पठाइएको महानगरीय प्रहरी वृत्त दरबारमार्गले जानकारी दिएको छ ।

स्थानीय, प्रहरी र दमकलको सहयोगमा अहिले आगो नियन्त्रणमा आएको छ ।