१० साउन २०८३, आइतबार
काठमाडौं– नेपाली कांग्रेस निकट नेपाल विद्यार्थी संघको १२औं महाधिवेशन आउँदो कात्तिकमा हुने भएको छ । कांग्रेस केन्द्रीय कार्यलय सानेपामा तिन दिनसम्म चलेको नेविसंघ केन्द्रीय समितिको वैठकले संघको १२औं महाधिवेशन कात्तिक १६, १७ र १८ गते गर्ने निणर्य गरेको हो ।
अध्यक्षसहित उपाध्यक्ष र महामन्त्रीहरूको ६ सदस्यीय समितिले केन्द्रीय समितिमा उठेका बिषयहरू समेटेर सबैसँग आवश्यक समन्वय गरि भदौ २७ गतेभित्र संघको संसोधित विधान, नियमावली २०७५ पार्टीलाई बुझाउने निर्णय गरेको छ । यस्तै, विधान, नियमावली पार्टीबाट अनुमोदन भएपछी लगत्तै क्याम्पस, जिल्लाहरुमा केन्द्रीय प्रतिनिधि खटाउने र अधिवेशन गर्ने भएको छ ।
जसअनुसार असोज ७ गते देशैभरका मावि र क्याम्पसको अधिवेशन, असोज १२ मा स्थानीय तहको अधिवेशन, असोज १५ मा प्रदेश क्षेत्र अधिवेशन, असोज २१ मा ७७ वटै जिल्लामा जिल्ला अधिवेशन, असोज २३ मा उपत्यकाभित्रका क्याम्पसको अधिवेशन, कात्तिक १० र ११ मा ७ वटै प्रदेशको अधिवेशन हुने छ ।
सोमबार राती १० बजे सकिएको नेविसंघ केन्द्रीय समितिले प्रस्तावित विधान र नियमावलीबाट नेविसंघमा लाग्ने भनिएको ३२ वर्षे उमेर हद पनि हटाएको केन्द्रीय सदस्य सुशील भट्टले जानकारी दिए ।
