तेह्रथुम–साढे सात मेगावाट क्षमताको विद्युत् उत्पादन गर्ने लक्ष्यका साथ शुरु भएको माथिल्लो खोरुंगा खोला साना जलविद्युत आयोजनाको काम ५० प्रतिशत सकिएको छ । तेह्रथुम पावर कम्पनीले निर्माण गरेको आयोजनाको काममा हालसम्म इन्टेक, पाइपलाइन एक्जाबेसन, पानी ट्यांकी सोलिङ, कनेक्टिीङ प्यानल र पावर हाउसका लागि भवन निर्माण भइसकेको छ ।

एक अर्ब ३७ करोड रुपैयाँको लगानीमा निर्माण शुरु भएको जलविद्युत् आयोजनामा माछापुच्छ्रे , एनबी  र जनता बैंकले १ अर्ब रुपैयाँ लगानी गरेका छन् । बाँकी ३७ करोडमा स्थानीयले १०, सर्वसाधारणले २०  र प्रमोटरले ७० प्रतिशत लगानी गरेका छन् । कामको जिम्मा लिएका धौलागिरी र खड्का कृष्ण जेबी कन्ट्रक्सनले आयोजना निर्माणको काम गरिरहेका छन् । 

आयोजनाको प्रवद्र्धक र नेपाल विद्युत् प्राधिकरण बीच हिउँदमा प्रतियुनिट ८ रुपैयाँ ४० पैसा र बर्खामा ४ रुपैयाँ ८० पैसामा विद्युत् खरिद सम्झौता (पीपीए) भएको छ । २०७६ पुष १ गते सम्ममा निर्माण कार्य सक्ने सम्झौता भएपनि ६ महिना अगाडी नै आयोजनाको काम सक्ने तयारी रहेको कम्पनीका प्रबन्ध निर्देशक मोहन डाँगीले बताए । 

जिल्लाबासीको लगानीमा बन्ने उक्त आयोजनाको काम शुरु भएसँगै स्थानीयले समेत रोजगारी पाएका छन् । अहिले यस आयोजनामा ३ सय बढी मजदुरहरुले काम गरिरहेका छन् ।