०५ साउन २०८३, मंगलबार
जनकपुरधाम –२ नम्बर प्रदेशका सांसदलाई ‘ल्यापटप’ दिने प्रक्रिया अगाडि बढेको छ । प्रदेशका १ सय ७ जना सांसद र सचिवालयका केही कर्मचारी समेतलाई ल्यापटप सुविधा उपलब्ध गराउन प्रदेश सभाले गृहकार्य अगाडि बढाएको छ । प्रदेशमा ६४ जना प्रत्यक्ष र ४३ जना समानुपातिक गरी १ सय ७ जना सांसद रहेका छन् ।
प्रदेशसभा सचिवालयका उपसचिव रंजित यादवका अनुसार प्रदेश सभामा काम गर्न सहज होस् भन्ने उद्देश्यले सबै सांसदलाई ल्यापटप उपलब्ध गराउन सचिवालयले प्रक्रिया अगाडि बढाइसकेको छ । १ सय ७ जना सांसदका लागि र कर्मचारी समेतका लागि १ सय २५ देखि १ सय ३० वटासम्म ल्यापटप किन्ने तयारी अगाडि बढेको उनले बताए ।
कस्तो र कुन मोडेलको ल्यापटप किन्ने भन्ने विषय निर्क्योल गर्न नेपाली कांग्रेस संसदीय दलका नेता रामसरोज यादव, नेकपा एमालेका सांसद सत्रुघन महतो र उपसचिव यादव रहेको समिति बनेको छ ।
समितिले कम्प्यूटरबारे जानकार विज्ञसँग छलफल गरेर ल्यापटपबारे छलफल समेत भइसकेको उपसचिव यादवले बताए । ८ जीबी र्यामको ल्यापटप किन्ने, कम्तिमा पनि ५ वर्ष वा ४ वर्षसम्मको वारेन्टी सहितको सुनिश्चितता हुने गरी १ लाख रुपैयाँसम्म पर्नसक्ने ल्यापटप किन्ने तयारी भएको उनले बताए ।
ल्यापटप किन्नका लागि अब चाँडै टेन्डर समेत आह्वान हुने लगभग तयारी पूरा भइसकेको उनले बताए । ‘ल्यापटप किन्न प्रदेश सभामा एकमुष्ठ बजेट पहिलेदेखि पनि छ, यदि घटी हुन पुगेमा प्रदेश सरकारले आवश्यक बजेट उपलब्ध गराउने कुरा समेत टुंगो लागिसकेको छ,’ उनले भने ।
सांसदले ल्यापटप बोक्ने भएपछि प्रदेशसभा कागजविहीन हुने गरी तयारी गरेको भएपनि ल्यापटप चलाउन नजान्ने सांसदलाई भने गाह्रो हुनेछ । यसका अतिरिक्त प्रदेशसभा सदस्यले मासिक ५२ हजार ६ सय रुपैयाँ पारिश्रमिक, बैठकभत्ता प्रतिदिन १ हजार रुपैयाँ पाइरहेका छन् ।
सञ्चार सुविधाबापत प्रतिमहिना ३ हजार रुपैयाँ, आवास सुविधाबापत १५ हजार प्रतिमहिना, ५ वर्षको लागि फर्निचरबापत एकमुष्ठ ५० हजार रुपैयाँ, निजी सचिवालय बन्दोवस्तबापत २ हजार रुपैयाँ प्रतिमहिना पाइरहेका छन् ।
बिजुली धाराबापत प्रतिमहिना २ हजार रुपैयाँ, स्वदेशमा दैनिक भ्रमण भत्ताबापत २ हजार ५ सय रुपैयाँ, विदेशमा भ्रमण गर्दा २ सय अमेरिकी डलर प्रतिदिन सुविधा पाइरहेका छन् ।
प्रदेशसभा सदस्यले राजपत्राकिंत तृतीय श्रेणीका १ जना स्वकीय सचिवको सुविधा पाइरहेका छन् ।
