काठमाडौं, १६ फागुन — यसपालीको अस्कर अवार्ड समारोहमा बेइज्जती हुने खालका गल्ती गरिएका छन् । पहिला ला ला ल्यान्डले जितेको घोषणा गरिएपनि अन्ततोगत्वा मूनलाइटले सर्वोत्कृष्ट फिल्मको अवार्ड जित्यो ।
त्यसैगरी अस्ट्रेलियाकी फिल्म निर्माता ज्यान च्यापम्यानलाई मृत्यु भएका कलाकारको सूचीमा समावेश गरियो । इन मेमोरियम सेक्सनमा उनको पनि चित्र समाविष्ट थियो ।
फोटो उनको भएपनि नाम र जन्ममृत्यु मिति चाहिँ उनकी साथी ज्यानेट प्याटरसनको राखिएको थियो । प्याटरसनको सन् २०१६ को अक्टोबरमा निधन भएको थियो ।
मरेको मानिसको सूचीमा आफ्नो तस्वीर प्रयोग गरिएकोमा आफूलाई चित्त दुखेको ज्यानले बताइन् । ‘म जिउँदै छु,’ उनले भनिन् ।
यसैबीच अस्करमा फिल्महरूमाथिको मतदान गणना गर्ने प्राइसवाटरहाउसकूपर्स नामक संस्थाले सर्वोत्कृष्ट चलचित्रको अवार्डमा भएको गल्तीप्रति माफी मागेको छ । ‘यो गल्तीप्रति हामी हृदयदेखि माफी माग्छौं र यसमाथि अनुसन्धान गरिने प्रतिबद्धता जनाउँछौं,’ उसले वक्तव्य जारी गर्दै भन्यो ।
द गार्डियनबाट
