काठमाडौं–श्रीलङ्काली राजनीतिले एकाएक रोचक मोड लिन पुगेको छ । दुई पटक देशको राष्ट्रपति भइसकेका महिन्दा राजपाक्षे शुक्रबार एकाएक देशको प्रधानमन्त्री चयन भएको अन्तराष्ट्रिय सञ्चारमाध्यमहरुले जनाएका छन् । 

राष्ट्रपति मैत्रीपाला सिरिसेनाको दल यूनाइटेड पिपुल्स फ्रिडम अलायन्स (यूपीएफए) सत्तारूढ गठबन्धनबाट बाहिरिएपछि राजपाक्षे प्रधानमन्त्री चुनिएका हुन् ।

युपीएफए गठबन्धनबाट बाहिरिएसँगै अल्पमतमा परेका प्रधानमन्त्री रनील विक्रमसिंघेलाई सिरिसेनाले बर्खास्त गर्दै राजपाक्षेलाई प्रधानमन्त्रीमा नियुक्ति गरेका हुन् । 

श्रीलङ्काली अङ्ग्रेजी दैनिक श्रीलङ्का टुडेले राजपाक्षेलाई सिरिसेनाले प्रधानमन्त्रीको रुपमा नियुक्त गरेको ट्वीटरमार्फत पुष्टि गरेको छ । 

पेसाले वकिल रहेका राजपाक्षे सन् १९७० मा पहिलो पटक श्रीलंकाको संसदमा प्रवेश गरेका थिए ।  त्यसको  ३४ वर्षपछि अर्थात सन् २००४ मा उनी देशको १८ औं प्रधानमन्त्री बने ।  यस्तै सन् २००५ मा उनी पहिलो पटक र २०१० मा दोस्रो पटक राष्ट्रपति चयन भए । यद्यपी सन् २०१५ मा भने उनी राष्ट्रपतिको दौडमा सिरिसेनासँग पराजित बन्न पुगेका थिए । 

अहिले फेरि उनै राजपाक्षे नाटकीय रुपमा देशको प्रधानमन्त्री बन्न पुगेका हुन् । 

राजपाक्षेले आफ्नो राष्ट्रपतिय कार्यकालयमा तत्कालिन बिद्रोही समूह लिवरेसन टाइगर अफ तमिल इलम (एलटीटीई–लिट्टे) प्रमुख प्रभाकरणलाई सैन्य कारबाहीमार्फत विनाश गरेका थिए । जुन कारबाही २००९ मा चलाइएको थियो ।

प्रभाकरणको मृत्यु पश्चात श्रीलंकामा २६ वर्ष लामो गृहयुद्ध समाप्त भएको थियो । 

यद्यपि, लिट्टेका प्रमुखको हत्यापछि उनीमाथि मानवअधिकार उलंघनको आरोप समेत लागेको थियो । उनले त्यतिबेला एक अन्तर्वार्ताका क्रममा भनेका थिए–लिट्टेसँगको भएको लडाईँमा कोही गैरसैनिक मारिएका छैनन् ।

यदी हामीले मानवअधिकार उलंघन गर्नु नै थियो भने लिट्टेविरुद्धको कारबाही साढे २ वर्ष लामो हुँदैनथियो । 

राजपाक्षे विगतमा पदमा हुँदा र नहु्ँदा पटक पटक नेपाल भ्रमणमा आएका थिए ।