काठमाडौं– उदयपुरको नेपालटारस्थित सब डिभिजन वन कार्यालयमा कार्यरत सहायक वन अधिकृतविरुद्ध भ्रष्टाचार मुद्दा दायर भएको छ । 

सेवाग्राहीबाट लिएको ६० हजार रुपैयाँ घुस रकमसति पक्राउ परेका सहायक वन अधिकृत सत्य नारायण साह रौनियारविरुद्ध विशेष अदालतमा भ्रष्टाचार मुद्दा दायर भएको हो । 

सहायक वन अधिकृत रौनियारले सामुदायिक वन उपभोक्ता समितिको काठ लगत गरी घाटगद्दी समेत गरी सकेकोमा घाटगद्दीमा रहेको काठको टुनटुक्राको घाटगद्दी मिलाई दिने भन्दै ६० हजार रुपैयाँ घुस लिएका थिए । 

अख्तियार दुरुपयोग अनुसन्धान आयोगको टोलीले रौनियारलाई घुस लिइसकेको अवस्थामा पक्राउ गरेको थियो । अख्तियारले ६० हजार रुपैयाँ बिगो दावी गर्दै भ्रष्टाचार निवारण ऐनको दफा ३ बमोजिमको कसुरअनुसार कारबाहीको माग गर्दै बुधवार विशेष अदालतमा मुद्दा दायर गरेको हो ।