काठमाडौं, २० फागुन — नेकपा एमालेले तराईमा मेची–महाकाली अभियान शुरु गर्ने तयारी गर्दैगर्दा तराईका जिल्लामा एमाले नेता कार्यकर्तामाथि आक्रमणका घटना बढेका छन् ।सप्तरीमा एमाले जिल्ला सदस्य प्रतापनारायण चौधरीमाथि मधेसी मोर्चाका कार्यकर्ताले कालोमोसो दलेको केही बेरमै एमाले सांसद रञ्जु कुमारी झा चढेको गाडीमाथि आक्रमण भएको छ ।

राजबिराजको मदनगरमा मधेसी मोर्चाका कार्यकर्ताले एमाले सांसदको गाडीमा ढुङ्गा हानेका हुन् । संसद्को महिला बालबालिका तथा समाजकल्याण समितिकी सभापति समेत रहेकी झामाथि पार्टी कार्यालयमा जाने क्रममा गाडीमा मोर्चा कार्यकर्ताले ढुङ्गा हानेका हुन् ।

‘पार्टी कार्यालय जानेक्रममा मेरो गाडीमा ढुङ्गा हानियो,’ एमाले पार्टी कार्यालय सिराहामा रहेकी सांसद झाले लोकान्तरसँग भनिन्, ‘कुनै क्षति भएको छैन ।’ सांसद झा संसदीय समितिका सभापतिले चढ्ने गाडीमा थिइन् ।
एमालेले तराई मधेसमा जागरण ल्याउन तथा संविधानमा रहेको भ्रम हटाउन अभियान शनिवारदेखि मेची–महाकाली अभियान शुरु गर्दैछ ।

तस्वीरः मधेस लाइभ डटकमबाट