काठमाडौं– संघीय मामिला तथा सामान्य प्रशासन मन्त्रालयले आइतबारसम्म २७ जिल्ला समन्वय समितिलाई स्थायी कर्मचारीको संख्या विवरण पठाउन निर्देशन दिएको छ । कर्मचारी समायोजनका लागि सबै जिल्ला समन्वय समितिले स्थायी कर्मचारीको विवरण पठाए पनि उक्त जिल्लाले विवरण नपठाएपछि आइतबारसम्म पठाउन निर्देशन दिइएको मन्त्रालयका स्थानीय तह समन्वय शाखाका अधिकृत जनकराज शर्माले जानकारी दिए ।

मन्त्रालयले सबै समन्वय समितिबाट विवरण सङ्कलन गरेर कर्मचारी समायोजन गर्ने जनाएको छ । पटकपटक विवरण पठाउन निर्देशन दिए पनि नटेरेपछि आइतबारसम्म विवरण पठाउन भनिएको उनले जानकारी दिए । 

ताप्लेजुङ, धनकुटा, खोटाङ, सप्तरी, धनुषा, महोत्तरी, पर्सा, रामेछाप, काभ्रेलाञ्चोक, सिन्धुपाञ्चोक, रसुवा, लमजुङ, कास्की, पर्वत, पूर्व नवलपरासी, पश्चिम नवलपरासी, पाल्पा, पूर्वी रुकुम, प्यूठान, बाँके, डोल्पा, मुगु, सुर्खेत, बाजुरा, बझाङ र बैतडी जिल्लाका समन्वय समितिलाई विवरण पठाउन भनिएको छ । 

कांग्रेसको विधान संशोधनको माग
नेपाली कांग्रेस जिल्ला कोषाध्यक्षहरूको राष्ट्रिय भेलाले पार्टीको विधान संशोधनको माग गरेका छन् । कोषाध्यक्षहरूको राष्ट्रिय समितिका अध्यक्ष गोविन्द पुडासैनीले शनिबार धादिङबेँसीमा पत्रकार सम्मेलन गरी मंसिर १४ र १५ गते घाटबेसीमा सम्पन्न भेलाले विधान संशोधनका १३ प्रस्ताव र समसामयिक राजनीतिसम्बन्धी पाँच प्रस्तावार गरेको जानकारी दिए ।

भेलाले पार्टीका सबै तहमा संकलन गरिएको शुल्कको ३० प्रतिशत रकम सोही तहमा आपतकालीन कोष निर्माण गरी राख्ने, पार्टीका सबै तहका पदाधिकारी एवं सदस्य र अनुशासन समिति निर्वाचनद्वारा नै चुनिने व्यवस्था गर्नुपर्ने माग गरेको छ ।

यस्तै जिल्ला कार्यसमितिका पदाधिकारी पदेन महाधिवेशन प्रतिनिधि हुनुपर्ने, एक व्यक्तिलाई एक पटक मात्र अवसर दिनुपर्ने, स्थानीय निर्वाचनमा गाउँपालिका तथा नगरपालिकासम्मको उम्मेदवार चयन गर्ने जिम्मा सम्बन्धित जिल्ला समितिलाई दिइनुपर्ने, उपमहानगर, महानगर र जिल्ला समन्वय समितिको उम्मेदवार चयन गर्ने अधिकार प्रदेश समितिलाई अधिकार दिनुपर्नेलगायतका माग भेलाले गरेको छ ।

नियमविपरीत १६ जिल्लामा कामु सीडीओ
निजामती सेवा ऐनको व्यवस्थाविपरीत सरकारले १६ जिल्लामा ६ महिनाभन्दा बढी समयदेखि कायममुकायम प्रमुख जिल्ला आधिकारी (सिडिओ) खटाएको छ । सहसचिवको दरबन्दी भएका जिल्लाहरूमा ६ महिनाभन्दा लामो समयदेखि उपसचिवहरूले कामु सिडिओका रूपमा काम गर्दै आएका हुन् । निजामती ऐनमा कुनै पनि कर्मचारीलाई ६ महिनाभन्दा बढी कायममुकायम बनाएर खटाउन नपाइने प्रावधान छ ।

इलाम, उदयपुर, सिन्धुली, सप्तरी, सिरहा, महोत्तरी, बारा, सिन्धुपाल्चोक, तनहुँ, बाग्लुङ, स्याङ्जा, गुल्मी, नवलपरासी, नवलपरासी (पूर्व), बर्दिया र डोटीमा ६ महिनाभन्दा लामो समयदेखि कामु सिडिओ छन् । सहसचिव अभाव भएकाले धेरै जिल्लामा उपसचिवलाई कामुको जिम्मेवारी दिएर खटाउनुपरेको गृह मन्त्रालयका प्रवक्ता रामकृष्ण सुवेदीले बताए । ‘सहसचिवको अभाव भएकाले कामु सिडिओहरूलाई नै निरन्तरता दिइएको हो,’ उनले भने, ‘यसका लागि विगतको नजिरका आधारमा सरकारले सहसचिव उपलब्ध नभएसम्म उनीहरूलाई अधिकार दिएको छ ।’

लोकसेवा आयोगले सहसचिवको नयाँ विज्ञापन नखुलाएको र धेरै सहसचिवलाई प्रदेशमा खटाइएकाले पनि उपसचिवलाई कामु दिएर खटाउनुपरेको गृहका अधिकारी बताउँछन् ।, नयाँ पत्रिकामा खबर छ ।

नेविसंघले जिल्ला अधिवेशन गर्न प्रतिनिधि खटायो 
नेपाल विद्यार्थी संघले देशभर जिल्ला अधिवेशन सम्पन्न गर्न केन्द्रीय प्रतिनिधि खटाएको छ । नेविसंघले पुस २८ देखि ३० गतेसम्म हुने १२औँ महाधिवेशन सम्पन्न गर्नका लागि शनिबार ७७ वटै जिल्लामा प्रतिनिधि खटाएको हो ।

अध्यक्ष नैनसिंह महरले संघको विधान र नियमावलीअनुसार सबै जिल्लामा निर्वाचन सम्पन्न गर्न केन्द्रबाट प्रतिनिधि खटाएको जानकारी दिए । खटाइएका प्रतिनिधि चार दिनभित्रमा तोकिएको जिल्लामा पुग्ने र नगए  प्रतिनिधिको विकल्पमा अर्को पठाइने छ । 

नेविसंघले सार्वजनिक गरेको कार्यतालिकाअनुसार मङ्सिर २२ गतेभित्र देशभरका सबै माध्यामिक तथा उच्चमाध्यामिक विद्यालय, मङ्सिर २५ भित्र स्थानीय गाउँ नगर, पुस ८ भित्र उपत्यकाभित्रका सबै क्याम्पस तथा विश्वविद्यालय, पुस १४ भित्र सबै जिल्ला र पुस २० भित्र सबै प्रदेशको अधिवेशन सम्पन्न गर्नुपर्ने रहेको छ । 

एचआइभी सङ्क्रमणमा कमी हुँदै
दशकअघि भयावह भनिएको एचआइभी सङ्क्रमण दरमा क्रमशः न्यूनीकरण हुँदै आएको सरकारी तथ्याङ्कले देखाएको छ । सामाजिक सचेतना, उपचार, कण्डम वितरण, दुव्र्यसन न्यूनीकरण, स्वास्थ्य परीक्षण र रोकथामका कार्यक्रमलाई तीव्रता दिएकाले रोगको सङ्क्रमण घटेको हो । 

राष्ट्रिय एड्स तथा यौन रोग नियन्त्रण केन्द्र टेकुका अनुसार एक दशकको प्र्रयासमा रोगको सङ्क्रमण दर घटेको र रोगप्रति हेर्ने दृष्टिकोणमा समेत परिवर्तन आएको छ । सन् २००५ मा नेपालमा सङ्क्रमण दर प्रतिएक हजार पाँच रहेकामा अहिले घटेर प्रतिएक हजार दुईमा झरेको छ । यस्तै लागुपदार्थ दुव्र्यसनी भएकाहरूको अध्ययनमा ६८ प्रतिशतमा सङ्क्रमण थियो अहिले झरेर ८ दशमलव ५ प्रतिशतमा झर्नु महत्वपूर्ण उपलब्धि हो भन्नुहुन्छ, रावल । यौनजन्य क्रियाकलापबाट भने ६ प्रतिशतबाट घटेर १ प्रतिशत सङ्क्रमण दर रहेको जनाइएको छ ।

सरकारी तथ्याङ्कअनुसार हाल नेपालमा २१ हजार १४८ जनामा एचआइभी सङ्क्रमण भएको पाइएको छ । नेपालमा ३१ हजार सङ्क्रमण रहेको अनुमान छ । नखुलेका १० हजारमध्ये सरकारले सन् २०२१ सम्ममा सात हजारलाई खोज्दै छ । सरकारले अहिले सङ्क्रमितको पहिचान गरेर स्वास्थ्य संस्थामा आउने वातावरणका लागि कार्यक्रम सञ्चालन गरेको केन्द्रले जनाएको छ । 

लघुवित्तलाई ग्रामीण क्षेत्रमा जान प्रधानमन्त्रीको आग्रह 
प्रधानमन्त्री केपी शर्मा ओलीले देश विकास र गरीबी निवारण अभियानमा सहभागी हुन लघुवित्त संस्थालाई अपिल गर्नुभएको छ । शनिबारदेखि काठमाडौंमा शुरु भएको दोस्रो लघुवित्त सम्मेलनलाई सम्बोधन गर्दै उहाँले भन्नुभयो, “शहरी र चक्रपथभित्रभन्दा पनि ग्रामीण क्षेत्रमा लघुवित्त संस्था जानुपर्छ ।” 

प्रधानमन्त्री ओलीले सुगमदेखि दुर्गमसम्मको सहभागिता रहेकाले लघुवित्तका सदस्य समृद्ध र सुखी भए गरीबीको समस्या आधा हल हुने विश्वास व्यक्त गर्दै लघुवित्तको विकासलाई बाधा पर्ने कुनै कानून भए सरकार संशोधन गर्न तयार रहेको बताउनुभयो । प्रधानमन्त्री ओलीले विभिन्न षड्यन्त्रबाट आएका शासकबाट जनता लामो समय शासित हुनुपरेकाले विकास हुन नसकेको उल्लेख गर्दै अहिले मुलुकमा स्पष्ट दृष्टिकोण र जनताको माया गर्ने सरकार रहेको धारणा व्यक्त गर्नुभयो । 

कक्षा ११ को रजिष्ट्रेशन फाराम भर्ने म्याद थप 
राष्ट्रिय परीक्षा बोर्डले कक्षा ११ को रजिष्ट्रेशन फारम भर्ने समय पुनः थप गरेको छ । बोर्डले एक सूचना जारी गदै रजिष्ट्रेशन आवेदन फाराम भर्ने म्याद थपेको हो । निर्धारित समयमा धेरै विद्यार्थीको फाराम भर्न छुटेको भन्ने गुनासो आएपछि भर्ने म्याद पुनः थप गरिएको बोर्डले जनाएको छ ।

फाराम बुझाउन छुट भएका विद्यालय र विद्यार्थीका लागि बोर्डको यही मङ्सिर १२ गतेको निर्णयानुसार बिलम्व शुल्क प्रतिविद्यार्थी ८०० रुपैयाँसहित हुने रकम बोर्डका नाममा जम्मा गरेको भौचर र रजिष्ट्रेशन आवेदन फाराम यही मङ्सिर १९ गतेभित्र बोर्डका सम्बन्धित शाखा कार्यालयमा बुझाउनु पर्नेछ । 

अस्वभाविक कार्यमा संलग्न बालबालिका नियन्त्रणमा 
अस्वाभाविक गतिविधिमा संलग्न भएको आरोपमा जिल्ला प्रहरी कार्यालय कास्कीले १८ वर्ष कम उमेरका २० बालबालिकालाई नियन्त्रणमा लिएको छ ।  उनीहरूले रातको समयमा रेस्टुराँ, डिस्को डान्स, दोहोरी साँझमा प्रवेश गरी मादक पदार्थ र चुरोट तथा हुक्का सेवन गरी अस्वाभाविक क्रियाकलाप देखाइरहेको भन्ने गुनासो प्राप्त भएपछि प्रहरीले अनुगमनको सिलसिलामा अस्वाभाविक कार्यमा संलग्न २० बालबालिकालाई नियन्त्रणमा लिएको हो ।

जिल्ला प्रहरी कार्यालय र वडा प्रहरी कार्यालयको संयुक्त टोलिले पोखरा नगरक्षेत्र र विशेष गरी लेकसाइड क्षेत्रमा रहेका विभिन्न होटल, रेस्टुराँ, डिस्को दोहोरी साँझ एवं डान्सबारमा अनुगमन गरी उनीहरूलाई नियन्त्रणमा लिएको बताइएको छ । नियन्त्रणमा लिइएकामध्ये पाँच बालिका रहेका प्रहरी प्रवक्ता रवीन्द्रमान गुरुङले जानकारी दिए ।

‘ए’ डिभिजन लिग
शहिद स्मारक ‘ए’ डिभिजन लिग फुटबलमा शनिबार भएका खेलमा संकटा क्लब र मनाङ मर्स्याङ्दी क्लब विजयी भएका छन् । संकटाले च्यासल युथ क्लबलाई २–१ गोल अन्तरले पराजित गरेको हो । 

हल्चोकस्थित एपीएफ मैदानमा संकटालाई जित दिलाउन अमित तामाङ र एलोन म्याक्सवेलले एक एक गोल गरे । च्यासलका सन्तोष साहुखलले एक गोल फर्काए । जितसंगै संकटा तेस्रो स्थानमा उक्लिएको छ । संकटाले पाँच खेलबाट ९ अंक जोडेको छ । पराजित च्यासल ४ अंक जोडेर आठौं स्थानमा छ । 

यस्तै, उपाधि दाबेदार तथा लिग लिडर सिग्नेचर मनाङ मर्स्याङ्दी क्लबले लिगमा लगातार पाँचौ जित निकालेको छ । शनिबारको खेलमा सरस्वती युथ क्लबलाई २ शुन्य गोल अन्तरले पराजित गर्दै मनाङले शतप्रतिशत जित निकालेको हो । मनाङलाई जित दिलाउन अन्जन बिष्ट र आफिज ओलावालेले समान एक एक गोल गरे ।