२६ जेठ २०८३, मंगलबार
काठमाडौं– नेपालको वैदेशिक व्यापारमा भारतको कब्जा कायमै रहेको देखिएको छ ।
व्यापार निकासी तथा प्रवर्द्धन केन्द्रको तथ्याङ्कअनुसार नेपालको वैदेशिक व्यापार भारतको कब्जामै रहेको देखिएको हो ।
चालू आर्थिक वर्षको पहिलो ५ महिनामा नेपालमा भएको कूल आयातको ६४ प्रतिशत आयात भारतबाट मात्रै भएको छ ।
यो गत वर्षको सोही अवधिको तुलनामा ३१ दशमलव १ प्रतिशतले भएको वृद्धि हो ।
गत वर्षको पहिलो पाँच महिनामा भारतबाट मात्रै २ खर्ब ९४ अर्ब ८९ लाख रुपैयाँ बराबरको वस्तु आयात भएकोमा चालू आर्थिक वर्षको सोही अवधिमा ३ खर्ब ८६ अर्ब ५५ लाख रुपैयाँ बराबरको वस्तु भारतबाट मात्रै आयात भएको हो ।
त्यस्तै गत आर्थिक वर्षको पहिलो पाँच महिनामा नेपालबाट भारततर्फ १८ अर्ब १८ रुपैयाँ बराबरको वस्तु निर्यात भएको थियो । चालू आर्थिक वर्षको सोही अवधिमा नेपालबाट भारततर्फ २१ अर्ब ९२ करोड रुपैयाँको वस्तु निर्यात भएको छ ।
चालू आर्थिक वर्षमा नेपालबाट हुने कूल निर्यातको ५८ प्रतिशत वस्तु भारततर्फ निर्यात भएको छ ।
चालू आर्थिक वर्षको पहिलो पाँच महिनामा नेपालको कूल वैदेशिक व्यापार ६ खर्ब ४४ अर्ब ५० करोड रुपैयाँ बराबरको भएको छ ।
सो अवधिमा नेपालबाट हुने निर्यात ३७ अर्ब ५० करोड रुपैयाँ बराबरको र कूल आयात ६ खर्ब ७ अर्ब रुपैयाँ बराबरको भएको तथ्याङ्कले देखाएको छ ।
गत आर्थिक वर्षको पहिलो पाँच महिनाको तुलनामा नेपालको कूल वैदेशिक व्यापार ३२ दशमलव ३ प्रतिशतले वृद्धि भएको तथ्याङ्कमा उल्लेख गरिएको छ ।
चालू आर्थिक वर्षको पहिलो पाँच महिनामा भारतपछि नेपालको सबै भन्दा बढी व्यापार चीनसँग भएको तथ्याङ्कले देखाएको छ ।
सो अवधिमा नेपालको कूल वैदेशिक आयातको १४ प्रतिशत चीनबाट मात्रै आयात भएको छ ।
नेपालबाट हुने कूल निर्यातको ३ प्रतिशत निर्यात चीनतर्फ निर्यात हुने भएको तथ्याङ्कमा उल्लेख गरिएको छ ।
चालू आर्थिक वर्षमा चीनसँगको व्यापारमा पनि वृद्धि भएको तथ्याङ्कले देखाएको छ ।
चीनबाट हुने आयातमा ४७ प्रतिशतले वृद्धि भएको र चीनतर्फ हुने निर्यातमा ३ दशमलव ७ प्रतिशतले वृद्धि भएको केन्द्रको तथ्याङ्कमा उल्लेख गरिएको छ ।
सो अवधिमा कूल आयातको २२ प्रतिशत आयात अन्य मुलुकबाट भएको तथ्याङ्कले देखाएको छ । अन्य मुलुकतर्फ नेपालबाट हुने कूल निर्यातको ३९ प्रतिशत वस्तु निर्यात भएको छ ।
नेपालको वैदेशिक व्यापार चीन र भारतबाहेक अमेरिका, जर्मनी, बेलायत, टर्कि, फ्रान्स, इटाली, कयानडा, जापन लगायतका मुलुकसँग हुँदै आएको छ ।
