घटनाको निष्पक्ष छानविन गरी दोषीउपर कानूनी कार्यवाही गर्न, मृतकका परिवारलाई उचित राहत र क्षतिपूर्ति उपलब्ध गराउन, घटनामा घाइते भएका सर्वसाधारण, प्रदर्शनकारी तथा सुरक्षाकर्मीहरुको निःशुल्क र प्रभावकारी उपचारको व्यवस्था मिलाउन आयोग नेपाल सरकारलाई आग्रह गरेको छ ।

झडपको क्रममा घाइते भएका तथा मृतकहरुको अवस्था सम्बन्धमा तथ्यहरु संकलन गर्न आयोगले क्षेत्रीय कार्यालय विराटनगरबाट धरान तर्फ एक अनुगमन टोली आजै परिचालन गरिएको आयोगले जनाएको छ ।

सप्तरीमा उपचाररत घाइतेहरुको अवस्था अनुगमनको लागि क्षेत्रीय कार्यालय जनकपुरबाट अर्को टोली खटाइएको आयोगले जनाएको छ । आयोगले एक विज्ञप्ती जारी गर्दै अनुगमनको क्रममा खटिएको टोली र सवारी साधन माथि भएको मोर्चाका कार्यकर्ताहरुको आक्रमणबाट भएको क्षतिप्रति आयोग खेद प्रकट गरेको छ ।

आयोगको अनुगमन, अनुसन्धान कार्यमा कतैबाट पनि अवरोध सृजना नगर्न आयोगले ध्यानआकर्षण गराएको छ ।
कुनैपनि व्यक्तिको जीवनको अधिकार सुनिश्चित गर्नुृपर्ने निकायबाटै अत्यधिक बल प्रयोग भई यस्तो परिस्थिति उत्पन्न हुनु मानव अधिकार सम्मत मान्न नसकिने समेत प्रवक्ता मोहना अन्सारीद्वारा जारी विज्ञप्तीमा उल्लेख गरिएको छ ।