१० असार २०८३, बुधबार
काठमाडौं — चीनको उत्तरी भागमा रहेको एक कोइलाखानीको छत भासिँदा कम्तीमा २१ जना मजदूरको मृत्यु भएको अधिकारीहरूले बताएका छन् ।
शनिवार भएको दुर्घटनामा ६६ जना मजदूरहरूलाई उद्धार गरिएको छ । घटना शान्शी प्रान्तमा रहेको शेन्मु शहरनजिकको लिजियागोउ खानीमा भएको हो ।
खानी भासिनुको कारणको अनुसन्धान भइरहेको आधिकारिक शिन्ह्वा समाचार संस्थाले जनाएको छ ।
चीनमा सुरक्षा सुधारका विभिन्न प्रयास भए पनि खानी दुर्घटना भइरहन्छन् ।
लिजियागोउ खानी बाइजी खानी कम्पनीले सञ्चालन गर्ने गरेको छ । घटनाको विस्तृत विवरण प्राप्त भएको छैन ।
गत अक्टोबर महिनामा पूर्वी शान्दोङ प्रान्तमा रहेको एक खानीमा भूमिगत चट्टान खसेपछि २१ मजदूरहरू मारिएका थिए ।
बीबीसीबाट
