फलेवास, पर्वत, २६ फागुन –जिल्लामा भित्रिने सरकारी बजेटको सबैभन्दा ठूलो हिस्सा सडकमै खर्चिने गरेपनि यहाँको एक विकट गाउँका बासिन्दाले १८ लाख रुपैयाँ ऋण र चन्दा खोजेर गाउँसम्म सडक पु-याएका छन् ।
उत्तरी पर्वतको बाँसखर्क–९ मालगाउँका बासिन्दाले चर्को ब्याजदरमा ऋण काँढेर सडक निर्माण गर्न बाध्य भएका हुन् । उनीहररूले लेकफाँटको लोप्रे सिमल्टेचौरदेखि मालगाउँसम्म जोड्ने सडक निर्माण गरेका हुन् ।
२०६६ मा चिनाखेतदेखि सुरु भएको सडकको ट्र्याक खोल्ने कार्यले बुधबार पूर्णता पाएको हो । सात किमी दूरीको यो सडक निर्माण सात वर्षमा पूरा भएको हो । सरकारी निकाय र स्थानीयवासीको ४२ लाख रुपैयाँको लागतमा सडक निर्माण भएको उपभोक्ता समितिका अध्यक्ष समबहादुर तिलिजाले जानकारी दिए ।
जिविस पर्वत, बाँसखर्क गाविस, सडक, बोर्ड, सांसद विकास कोष र निर्वाचन क्षेत्र विकास कार्यक्रमबाट २४ लाख रुपैयाँ अनुदान प्राप्त भएको थियो भने सडक निर्माण गर्न स्थानीय बासिन्दाले १८ लाख रुपैयाँ ऋण र चन्दा सङ्कलन गरेका थिए । स्थानीय बासिन्दा, सहकारी सङ्घसंस्था, आमा समूहलगायतबाट उक्त ऋण लिइएको हो । यो सडक छिमेकी जिल्ला म्याग्दीको बेनीदेखि मल्लाज–बगरफाँट–बाँसखर्क हुँदै लोप्रे पुग्न छोटो दूरीको हुने अध्यक्ष तिलिजाले बताए ।
यो सडकबाट उत्तरी पर्वतका बाँसखर्क, मालगाउँ, लोप्रे, डाँडाकटेरी, कुवापानी र म्याग्दीका राम्चे, काफलडाँडा र नांगीका बासिन्दा लाभान्वित भएका छन् । उक्त क्षेत्रका बासिन्दालाई म्याग्दीको बेनी पुग्न सजिलो हुने जनाइएको छ । लोप्रेदेखि बेनीसम्म साढे एक घन्टामै आउन सकिने अध्यक्ष तिलिजाले जानकारी दिए ।
यसअघि लेकफाँटदेखि मिलनचोक हुँदै बेनी आउन कम्तीमा तीन घन्टा गाडीमा यात्रा गर्नुपर्दथ्यो । जोखिममुक्त छोटो बाटो बनेपछि गाडी चढ्नका लागि महँगोमा जिप रिजर्भ गर्नुपर्ने मालगाउँका बासिन्दाको बाध्यतासमेत हटेको स्थानीयवासीले बताएका छन् । लामो सङ्घर्ष र ऋण धन गरेरै भए पनि गाउँसम्म सडक सुविधा पुगेपछि मालगाउँका बासिन्दा हर्षित बनेका छन् ।
