सुर्खेत– कर्णाली प्रदेशको राजधानी वीरेन्द्रनगरमा रेल भित्रिएको छ । वीरेन्द्रनगरको घण्टाघरमा व्यवसायी चिन्तामणि शर्माले उक्त रेल कुदाउन सुरु गरेका हुन् । 
तर यो रेल मालवाहक भने होइन । 

सुर्खेतको चर्चित पर्यटकीय स्थल घण्टाघर पार्कमा बालबालिकालाई चढाउने सानो रेल सेवा सुरुवात भएको व्यवसायी शर्माले जानकारी दिए । व्यवसायी शर्माले चिल्ड्रेन पार्क निर्माणका लागि ४० लाख बराबरको रकम खर्च गरेको बताए ।  ‘बाल उद्यानमा मात्रै मेरो चालिस लाख जति खर्च हुन्छ ।’ उनले भने, ‘उद्यानमा रेलसहित अन्य झुलाहरु समेत राखेका छौं ।’

डिजेलबाट चल्ने रेल काठमाडौंबाट ल्याइएको शर्माले बताए । ‘रेल काठमाडौंबाट ल्याएका हौं’ उनले भने, ‘डिजेलबाट सञ्चालन हुने भएका कारण एक सय रुपैंया जति दर लगाउने योजना बनाएका छौं । अहिले नै टुगों लागेको छैन ।’
कर्णालीमै पहिलो पटक यस्तो रेल ल्याइएको दाबी उनको छ ।  ‘रेलमा ड्राइभरसहित चार ओटा डिब्बा रहेका छन् ।’ उनले भने, ‘आज साँझबाटै रेल चढन पाईने भएको छ ।’