काठमाडौं– प्रधानमन्त्री केपी शर्मा ओलीले विप्लव नेतृत्वको नेकपालाई कडा चेतावनी दिएका छन् । माओवादीको नाममा विभिन्न आतंक मच्चाउने काम गरेको भन्दै ओलीले विप्लव नेतृत्वको नेकपाको चर्को आलोचना गरेका हुन् । 

शुक्रवार सीके राउत समूहसँगको राजनीतिक सहमति कार्यक्रमलाई सम्बोधन गर्दै प्रधानमन्त्री ओलीले नेकपाको नाममा विप्लवले मुलुकमा आतंक मच्चाएको भन्दै पार्टीको नाम 'लुटेरा समूह विप्लव' राख्न सुझाव दिए । उनले थपे, 'लुटेरा समूह प्रकाण्ड विप्लव राखे पनि हुन्छ ।' 

उनले लुट र आतंक मच्चाउनु नै भए नेकपाको बर्को फ्याकेर त्यस्ता क्रियाकलाप गर्न ओलीले विप्लवलाई चुनौती दिए । ‘नेकपा भन्ने बर्को त फ्याक्नुस कम्तीमा । आफूले पनि नेकपा भन्नु पर्‍या छ । त्यस्ता पनि नेकपा,’ ओलीले भने, ‘सर्वसाधारणप्रति दमन गर्न पाइन्छ ? चन्दाका नाउँमा मान्छेलाई त्रास दिने ? उनले प्रश्न गरे ।