काठमाडौं– सरकारले आगामी आर्थिक वर्षमा सार्वजनिक यातायातमा यात्रा कार्डको व्यवस्था गर्ने लक्ष्य अघि सारेको छ ।

आगामी आर्थिक वर्षको नीति तथा कार्यक्रम सार्वजनिक गर्दै राष्ट्रपति विद्यदेवी भण्डारीले यस्तो लक्ष्य रहेको बताइन् । ‘सार्वजनिक यातायातका साथमा यात्रा कार्डको व्यवस्था गरिने छ’ संसदमा नीति तथा कार्यक्रम सार्वजनिक गर्दै राष्ट्रपतिले भनिन्, ‘ठूलो सार्वजनिक सवारी साधन सञ्चालनलाई प्रोत्साहित गरिने छ ।’

आगामी आर्थिक वर्ष २०७६/०७७ मा विद्युतीय सवारीमा जोड दिने सरकारी लक्ष्य छ ।

‘विद्युतीय सवारी साधनको प्रयोगलाई प्रोत्साहित गरिने छ’ सरकारको नीति तथा कार्यक्रममा भनिएको छ- ‘प्रदेश, स्थानीय र निजी क्षेत्रको सहकार्यमा सातै प्रदेशमा विद्युतीय बस सञ्चालनमा ल्याइने छ ।’ 

विद्युतीय बसका लागि पर्याप्त चार्जिङ स्टेसन बनाइने नीति तथा कार्यक्रममा समावेश गरिएको छ ।