कतार– रमादानको पवित्र महिनाको अवसरमा, कतार एयरवेजले कतार च्यारिटीसँगको सहकार्यमा एक कार्यक्रम आयोजना गरी काठमाडौंमा अभावमा रहेका परिवारहरूलाई अत्यावश्यक खाद्य सामाग्री प्रदान गरेको छ ।

उक्त कार्यक्रम ११ मे २०१९ शनिवारको दिन काठमाडौंको कमलादीस्थित सीडब्लु पार्टी प्यालेसमा आयोजना गरिएको थियो । 

सो कार्यक्रम मार्फत प्रत्येक परिवारले २५ किलो चामल, ३ किलो चिनी, ५ किलो पिठो, ३ किलो चना, १ किलो नुन, १ किलो सनफ्लावर सिड्स र ५ लिटर सनफ्लावर तेल प्राप्त गरेका छन् ।  

नेपालको लागि कतार एयरवेजका स्थानीय प्रमुख मोहम्मद एल ईमामले भने, 'यहाँ काठमाडौंमा यी परिवारहरूलाई अत्यावश्यक सामाग्री उपलब्ध गराएर सहयोग गर्ने अवसर पाउँदा हामी अत्यन्तै खुशी छौं । कतार च्यारिटीसँगको सहकार्यमा आयोजित यस अभियान नेपालका जनताहरूप्रतिको हाम्रो प्रतिबद्धता प्रदर्शन गर्ने एक माध्यम पनि हो । रमादानको पवित्र उत्सवले अरूलाई दिनुको महत्वको बारेमा हामीलाई स्मरण गराउँछ र हामी काठमाडौंको स्थानीय समुदायलाई सहयोग पुर्‍याउने मौका प्राप्त गर्दा निकै हर्षित छौं ।'