१९ असार २०८३, शुक्रबार
धनगढी- नेपाली काँग्रेसका वरिष्ठ नेता रामचन्द्र पौडेलले पार्टीको १४ औं महाधिवेशन टार्न सभापतिले नै चलखेल शुरू गरेको आरोप लगाएका छन् ।
नेपाली कांग्रेसको जागरण अभियान अन्तर्गत कैलालीको कैलारी गाउँपालिकाको हसुलियामा आयोजित कार्यकर्ता भेलालाई सम्बोधन उनले पार्टी सभापति शेरबहादुर देउवा नै महाधिवेशन टार्ने चलखेलमा लागेको आरोप लगाएका हुन् ।
‘पार्टीमा विजय गच्छदारको पार्टी मिलेपछि समायोजनाको काम गर्न ढिलाइ गरिँदै छ । संगठनलाई संविधानको संरचना अनुसार बनाउन ढिला गरिँदैछ,' पौडेलले भने, 'यसले गर्दा महाधिवेशन टार्ने चलखेल भएको स्पष्ट भएको छ ।'
देउवाले आफ्नो पक्ष हार्ने डरले पार्टीका भ्रातु संगठनको अधिवेशन रोकेको भन्दै पौडेलले संगीन आरोप लगाएका छन् । उनले संवैधानिक परिषदको बैठकमा सहभागी नभएर पार्टी सभापति देउवाले ठूलो गल्ती गरेको स्पष्ट पारे ।
पौडेलले भने, ‘संवैधानिक परिषद्को बैठकमा विपक्षी दलको नेताको हैसियतमा नगएर पार्टी सभापतिले ठूलो गल्ती गर्नुभएको छ ।’
