२४ जेठ २०८३, आइतबार
काठमाडौं – अमेरिकाका राष्ट्रपति डोनल्ड ट्रम्पले इरानसँग अमेरिकाले युद्ध नगर्ने आशा गरेको तर युद्ध भएमा उसले भयंकर शक्ति प्रयोग गर्ने बताएका छन् ।
बुधवार फक्स बिजनेस न्युजसँगको भेटघाटमा ट्रम्पले यो कुरा बताएका हुन् ।
दुई देशबीच तनाव चलिरहँदा ट्रम्पले भने, ‘युद्ध नहोला जस्तो लाग्छ तर भइहाल्यो भने अमेरिकी अत्यन्तै बलियो स्थितिमा छ । यो युद्ध लामो हुने छैन ।’
केही दिनअघि इरानले अमेरिकाको एउटा ड्रोन खसाएपछि दुई देशबीचको तनाव झनै बढेर गएको छ । त्यसपछि ट्रम्पले इरानमाथिको प्रतिबन्ध झनै कडा बनाएका छन् । उनले जवाफी कारवाहीको आदेश दिएर पछि आदेश फिर्ता लिएका थिए ।
सोमवार पत्रकारहरूसँग कुराकानी गर्दै ट्रम्पले भनेका थिए, ‘हामीहरू इरान वा अन्य कुनै देशसँग संघर्ष चाहँदैनौं । हामीहरू इरानलाई आणविक हतियार चाहिँ बनाउन नदिने कुरा तपाईंहरूलाई बताउन चाहन्छु ।’
एजेन्सी
