काठमाडौँ, १३ चैत– रत्नराज्यलक्ष्मी (आरआर) क्याम्पसमा आगामी मंगलबार हुन लागेको स्वतन्त्र विद्यार्थी युनियन (स्ववियु) निर्वाचन स्थगन गर्न ९ विद्यार्थी संगठनले माग गरेका छन् ।
सत्तारुढ दलका नौ विद्यार्थी सङ्गठनले विज्ञप्ति जारी गरी स्नातकोत्तर तह द्वितीय वर्षको परीक्षा भइरहेको र निर्वाचनमा सबै विद्यार्थी सङ्गठनको सहभागी हुने वातावरण नभएकाले हाल निर्वाचन स्थगन गरी नयाँ मिति तोक्न क्याम्पस प्रशासनसँग माग गरेका छन् ।
नेपाल विद्यार्थी संघका अध्यक्ष नैनसिंह महरले ‘विद्यार्थी संगठनहरुलाई बाहिर राखेर निर्वाचन गर्न थालिएकाले,’ स्थगन गर्नुपर्ने बताए ।
यसअघि फागुन २३ गते स्ववियु निर्वाचन स्थगन भएको थियो । सर्वोच्च अदालतले काठमाडौँका प्रजिअ र क्याम्पस प्रशासनका नाममा निर्वाचन गर्न यही चैत २ गते अन्तरिम आदेश जारी गरेपछि क्याम्पस प्रमुख डा निर्मलकुमार सुवालले शनिबार सूचना प्रकाशन गरी मङ्गलबार नयाँ मिति तोकेका हुन् ।
अनेरास्ववियु (क्रान्तिकारी)का प्रवक्ता सुरेन्द्र बस्नेतले अदालतको आदेशभन्दा पनि विद्यार्थी सङ्गठनको सहमतिमा निर्वाचन हुनुपर्नेमा जोड दिए ।
आरआरमा नेपाल विद्यार्थी सङ्घ, अखिल (छैटौँ) र अखिल (पाँचौँ)ले मनोनयनपत्रसमेत दर्ता गराएका छैनन् । क्याम्पस प्रमुखले आज सूचना प्रकाशन गरी स्थगित निर्वाचन आगामी मङ्गलबार हुने जानकारी गराएका छन् ।
विद्यार्थी मतदान गर्न लाइनमा बसे पनि स्थानीय प्रशासनले स्थानीय निर्वाचन आचारसंहिता लागेको जनाउँदै निर्वाचन स्थगन गराएको थियो ।
