महेन्द्रनगर, १८ चैत– भौतिक योजना तथा यातायात मन्त्री रमेश लेखकले करिब दुई महिनाअघि शिलान्याश गरेको कञ्चनपुरको डोकेबजार – बेलौरी हुलाकी सडक मार्गको काम बल्ल सुरु भएको छ ।

भारत सरकारको सहयोगमा निर्माणकार्य सुरु गर्ने भनिएकामा उक्त सडक खण्डमा पछिल्लो पटक भारत सरकारले निर्माण नगर्ने जनाएपछि नेपाल सरकारले निर्माण गर्न लागेको हो ।

कञ्चनपुरको डोकेबजारदेखि बेलौरीसम्म १९ किलोमिटर सडक खण्डमा रहेका पुराना हिममपाइप हटाएर कल्भर्ट हाल्ने काम तीव्र गतिमा भइरहेको छ ।

उक्त सडक खण्ड निर्माणको ठेक्का शर्मा र राजेन्द्र जेबी कम्पनीले पाएको छ । सो सडकका लागि ३६ करोड ४७ लाख रुपैयाँ बजेट छुट्याइएको छ ।

सडकको चौडाइ सात मिटर पक्की र दुबैतर्फ अढाइ मिटरको वेश रहने निर्माण कम्पनीका इन्जिनियर रोशन भट्टले जानकारी दिए ।