०९ असार २०८३, मंगलबार
काठमाडौं – बेलायतको म्यानचेस्टरबाट स्पेनको टेनेरिफे गइरहेको ईजीजेटको एक विमानमा झैझगडा गर्ने सातजना बेलायतीलाई विमानबाट निकालिएको छ ।
विमानमा झगडा भएपछि पोर्चुगलको फारोमा आकस्मिक अवतरण गराउनुपरेको थियो । घटना बिहीवार साँझमा भएको थियो ।
विमान उडेको लगभग दुई घन्टापछि झगडा शुरू भएको बताइएको छ । पछिल्तिरको सीटमा बसेका चारजनाले एकअर्कालाई मुक्का हान्न थालेपछि झगडा आरम्भ भएको थियो ।
एकजना एयर होस्टेसले झगडा शान्त बनाउन खोजेकी थिइन् र एकजना झगडालुलाई अघिल्तिरको सीटमा बस्न लगाएकी थिइन् ।
तर केही मिनटपछि ती व्यक्ति फर्केर पहिलेकै ठाउँमा आए अनि झगडा शुरू गरे ।
अन्य यात्रीले झगडा शान्त बनाउन खोजे र त्यसक्रममा एक पुरुषले एक महिलाको आँखामा थुकिदिए ।
झगडा भएपछि विमानका पाइलटले विमानलाई दिशा परिवर्तन गराए र फारोमा आकस्मिक अवतरण गराए ।
विमान अवतरण गराएपछि झगडा गर्नेहरूलाई प्रहरीले पक्राउ गरी बसमा कोचेको थियो ।
एजेन्सी
