२४ जेठ २०८३, आइतबार
काठमाडौं – दिल्लीको तीस हजारी अदालतमा शनिवार प्रहरी र वकिलहरूबीच हिंस्रक झडप हुँदा २० प्रहरी घाइते भएका छन् ।
पुरानी दिल्ली कोतवालीका एसएचओलाई १० वटा टाँका लगाउनुपरेको छ । एक कन्स्टेबल गम्भीर रूपमा घाइते भएका छन् र आईसीयूमा भर्ना गरिएका छन् ।
प्रहरीहरूले लकअपमा आफूलाई थुनेर ज्यान जोगाउनुपरेको छ ।
वकिलहरूले प्रहरीमाथि आक्रमण गरेपछि प्रहरीले आफूलाई बचाउन लकअपतर्फ गएर बन्द गरेका थिए ।
वकिलहरूको भीडले लकअपको ताल्चा फोर्ने कोशिश गरेको थियो । ताल्चा फोर्न नसकेपछि लकअपको अघिल्लो भागमा उनीहरूले आगजनी गरे ।
पछि प्रहरीहरूले वकिलहरूलाई लकअपलाई बाहिर निकाले र लकअपलाई सेफ जोन बनाउँदै फोर्स नआउन्जेलसम्म त्यहीँ लुकिबसे ।
झगडा सामान्य विषयमा भएको थियो । अदालत परिसरमा एक वकिलले गलत ठाउँमा गाडी पार्क गरे । प्रहरीले तुरुन्त गाडी हटाउन भनेपछि वकिलसँग झगडा भयो ।
झगडा बढ्दै गएपछि अरू वकिल पनि मिसिए । प्रहरीले केही वकिलहरूलाई कोर्टकै लकअपमा थुनिदियो अनि त वकिलहरू उग्र भए ।
वकिलहरूले सञ्चारकर्मीहरूसँग दुर्व्यवहार गरे । अनेकौं मानिसको मोबाइल फोन खोसेर क्षतिग्रस्त बनाइयो ।
एजेन्सी
