समाजवादी फोरमले सरकार छाडेसँगै प्रधानमन्त्री केपी शर्मा ओलीले थप दुई वटा मन्त्रालयको जिम्मेवारी सम्हाल्ने भएका छन्।

राष्ट्रपति विद्यादेवी भण्डारीले प्रम ओलीलाई कानुन, न्याय तथा संसदीय मामिला मन्त्रालय र सहरी विकास मन्त्रालयको जिम्मेवारी सम्हाल्ने गरी जिम्मेवारी तोकेकी हुन्।

कानुन मन्त्री उपेन्द्र यादव र सहरी विकास मन्त्री मोहम्मद इश्तियाक राईले मंगलबार राजीनामा दिएका थिए। उक्त दलले सरकारलाई दिएको समर्थन पनि बुधबार फिर्ता लिइसकेको छ।

संविधानको धारा ७७ को उपधारा २ (क) बमोजिम यादव र राईले पदबाट राजीनामा दिएपछि प्रधानमन्त्रीको सिफारिसमा उनीहरुले सम्हाल्दै आएको जिम्मेवारी प्रधानमन्त्री ओलीलाई दिइएको राष्ट्रपति कार्यालयद्वारा जारी विज्ञप्तिमा उल्लेख छ।