भारतको कर्नाटक राज्यमा रक्सीले टिल्ल परेको एक सपेराले सर्पलाई चुम्बन गर्ने हुँदा सर्पले उसको मुखैमा डसिदिएको छ । 

भद्रावती शहरमा गोमन सर्प देखिएपछि आत्तिएका मानिसले सोनु सपेरालाई बोलाएका थिए ।

घटनाको भिडियोमा रक्सीले मात्तिएर हल्लिँदै आएका सोनुले चार फीट लामो गोमनलाई झुकेर चुम्न खोजेको अनि रिसाएको सर्पले उनलाई डसेको देखिन्छ । सर्पले डसेपछि उनलाई अस्पतालमा भर्ना गरिएको छ र जीवन बचाउन विषको प्रभाव घटाउने एन्टी–भिनम दिइएको छ । 

सर्पको डसाइपछि उनको मुखवरिपरिको भाग सुन्निएर हेर्नै नहुने भएको र एक हप्तासम्म कडा पीडा सहनुपरेको थियो ।

मदिराका कारण होश गुमाएको अवस्थामा उनले सजिलै सर्पलाई समातेका थिए जबकि त्यो सडकपेटीको स्ल्याबमुनि लुकेको थियो । अतिविश्वासका कारण सोनुले विषालु सर्पसँग खेल्न थाले ।

रिसाएको सर्पलाई उनले किस गर्न खोज्दा सर्पले उनलाई मुखैमा डसिदियो र कडा विष पारिदियो ।

एजेन्सी