काठमाडौँ, ६ पुस- आपराधिक घटनामा अवैध साना हतियारको प्रयोग अझै भइरहेको देखिएको छ । नेपाल प्रहरीको अपराध अनुसन्धान विभागका अनुसार साना हतियारको आडमा हत्या, अपहरण, चन्दा तथा फिरौती असुली, लुटपाटलगायत आपराधिक घटना हुने गरेको आजको कारोबार दैनिकमा खबर छ ।
दुई दिनअघि मात्रै अज्ञात समूहले पेस्तोल प्रहार गरी रूपन्देहीमा नेकपा (एमाले)निकट युवा संघ नेपालका जिल्ला अध्यक्ष दुर्गा तिवारीको हत्या गरेको छ । पछिल्लो पाँच वर्षको अवधिमा मात्रै कटुवा पेस्तोल, रिभल्बरलगायत साना हतियारको आडमा आपराधिक घटनामा संलग्न ८ सय २६ अभियुक्त पक्राउ परेका छन् ।
सञ्चार उद्यमी जमिम शाह, इस्लामिक संघ नेपालका महासचिव फैजान अहमद, बाराका एमाले नेता मोहम्मद आलमलगायत उद्योगी, सर्वोच्च अदालतका न्यायाधीश रणबहादुर बमलगायतको हत्यामा पनि साना हतियारकै प्रयोग भएको थियो ।
यीसहित विभिन्न आपराधिक घटनामा संलग्न अभियुक्तको साथबाट पाँच वर्षको अवधिमा प्रहरीले ७ सय २६ थान पेस्तोल बरामद गरेको छ । उक्त अवधिमा १ लाखभन्दा बढी अपराधका उजुरी प्रहरीसमक्ष दर्ता भएकोमा ३० प्रतिशतमा अवैध हतियारको प्रयोग भएको देखिन्छ ।
आपराधिक समूहका गतिविधि कमजोर हुँदै गए पनि बरामद र पक्राउको संख्या हेर्दा अझै साना हतियार शान्ति सुरक्षा व्यवस्थापनमा मुख्य चुनौती रहेको प्रहरी अधिकारी स्वीकार गर्छन् ।
