२६ जेठ २०८३, मंगलबार
गण्डकी प्रदेशका प्रदेश सभा सदस्य राजीव गुरुङ उर्फ दीपक मनाङ्गेलाई २ दिन हिरासतमा राख्न म्याद थप भएको छ ।
जिल्ला प्रहरी कार्यालय कास्कीले अनुसन्धानका लागि ३ दिन माग गरेपनि जिल्ला सरकारी वकिलको कार्यालय कास्कीले २ दिनमात्र माग दाबी गरेको थियो, सोहीअनुरूप जिल्ला प्रशासन कार्यालय कास्कीले २ दिनको म्याद दिएको हो ।
कास्कीका प्रमुख जिल्ला अधिकारी रमेशबहादुर केसीले अनुसन्धानका लागि आवश्यक भएमा थप म्याद दिन सकिने बताए । प्रहरीले भने भोलि (शनिबार) भएकाले ३ दिन माग गरेको थियो ।
एन्फा कास्कीका अध्यक्ष मिलन गुरुङलाई गत मंगलबार पोखराको लेखनाथमा आयोजित मुख्यमन्त्री कप फुटबल प्रतियोगिता उद्घाटनकै बेला सांसद मनाङ्गेले झापड हानेका थिए ।
सोको विरुद्ध एन्फा कास्की अध्यक्ष मिलनले जिल्ला प्रहरीमा दिएको जाहेरी दरखास्तपछि बिहीबार मनाङ्गे पोखरा लेकसाइडस्थित एक होटलबाट पक्राउ परेका थिए ।
म्याद थपका लागि जिल्ला प्रशासन कार्यालयमा उपस्थित गराइएका सांसद मनाङ्गेले पत्रकारसँग संक्षिप्त कुराकानी गर्दै आफ्नो मिसन सफल भएको प्रतिक्रिया दिएका छन् ।
उनले भने, ‘मेरो मिसन सफल भयो । उसले (मिलन गुरुङ) पोखरामा १० वर्षदेखि सबैलाई ठग्दै आएको रहेछ ।’
यसैबीच, सांसद मनाङ्गेविरुद्ध उजुरी दिने एन्फा कास्कीका अध्यक्ष मिलन गुरुङलाई पनि शुक्रबार दिउँसो पोखरा न्यूरोडबाट प्रहरीले पक्राउ गरेको छ ।
गुरुङको पक्राउलाई मनाङ्गेले आफ्नो मिसन पूरा भएको रूपमा अर्थ्याउन खोजेका थिए ।
उनीविरुद्ध ठगी तथा चेक बाउन्स (बैंकिङ कसूर) को उजुरी परेको जिल्ला प्रहरी कार्यालय कास्कीका प्रवक्ता राजकुमार केसीले जानकारी दिए ।
उनले भने, ‘उनीविरुद्ध ठगी तथा चेक बाउन्सको उजुरी परेकाले उच्च जिल्ला अदालत पोखराबाट अनुमति लिई जिल्ला प्रहरी कार्यालयले पक्राउ पूर्जी दिएको हो ।’
स्रोतका अनुसार उनीविरुद्ध पोखरा– ६ लेकसाइडस्थित ओम गोरा जोस्टल होटलका सञ्चालक हरिभक्त आचार्यले २ लाख ठगीको आरोपमा बैंकिङ कसूरको मुद्दा दायर गरेका थिए ।
