आगामी साता अनिवार्य अवकाश पाउन लागेका गृहसचिव प्रेमकुमार राईले राजीनामा दिएका छन् ।

माघ २२ गतेदेखि अनिवार्य अवकाश पाउन लागेका राईले माघ २० गतेदेखि लागू हुने गरी राजीनामा दिएका गृह मन्त्रालय स्रोतले लोकान्तरलाई जानकारी दियो । उनले मुख्यसचिव लोकदर्शन रेग्मी समक्ष राजीनामा पेश गरेका हुन् ।

२०४९ साल अगाडि निजामती सेवामा प्रवेश गरेका कर्मचारीले राजीनामा दिँदा पेन्सन बढ्ने भएकाले राईले २ दिन अगावै राजीनामा गरेको स्रोतले बतायो । गृह मन्त्रालयमा लामो समय काम गरेका राई निर्विवाद सचिवको रुपमा बाहिरिन लागेका हुन् । 

राईसँगै अर्थ मन्त्रालयका सचिव राजन खनाल तथा सचिवहरू गजेन्द्र ठाकुर र रामकुमार आचार्यले पनि माघ २२ गते अवकाश पाउँदैछन् ।

नयाँका लागि दौडधूप शुरू

प्रेम राइको राजीनामासँगै गृह मन्त्रालयको सचिव बन्नका लागि दौडधूप शुरू भएको छ । महत्त्व र सुविधाको हिसाबले निजामती सेवामा गृहसचिव आकर्षक पदको रुपमा लिइन्छ । 

प्रधानमन्त्री कार्यालयसँग प्रत्यक्ष सम्पर्क रहने, देशको शान्ति सुरक्षाको जिम्मा रहने तथा सूत्र परिचालनमार्फत अडिट नहुने रकम खर्च गर्न मिल्ने भएका कारण पनि गृहसचिवलाई आकर्षक मानिन्छ । 

सचिवमा बढुवा हुन लागेका हाल कोलकत्तास्थित नेपाली महावाणिज्यदूत एकनारायण अर्याललाई बढुवा गरेर उनलाई गृहसचिव बनाउनेबारे नेकपामा छलफल शुरू भएको छ ।

काठमाडौंको प्रमुख जिल्ला अधिकारीको रुपमा खेलेको भूमिका र महावाणिज्यदूतको रुपमा खेलेको भूमिकाका कारण अर्यालप्रति स्वयं प्रधामनन्त्री केपी शर्मा ओली प्रशन्न रहेको बताइन्छ ।

काठमाडौंको सीडीओ रहेको समयमा उनले अखाद्य बस्तुको गोदाममा छापा हानेका थिए । २०७२ सालको भूकम्पपछि कालोबजारी गर्न गोदाममा खाद्यान्न लुकाउने व्यापारीको गोदाममा छापा हानेका थिए । सहसचिव अर्याल केही समयमै सचिवमा बढुवा हुँदैछन् ।

उनले पटक–पटक सीडीओको रुपमा समेत काम गरेका छन् । निजामती सेवामा उनी निर्णय गर्ने क्षमता भएका निर्विवाद प्रशासकको रुपमा चिनिन्छन् ।

गृहसचिवका लागि हाल संघीय मामिला तथा सामान्य प्रशासन मन्त्रालयका सचिव यादव कोइरालाले दौडधूप बढाएका छन् । गृह प्रशासन अन्तर्गत विभिन्न जिल्लामा सीडीओ र पछिल्लो समय गृह मन्त्रालयमा शान्ति सुरक्षा महाशाखामा काम गरेको अनुभव कोइरालासँग छ । 

हाल अख्तियार दुरुपयोग अनुसन्धान आयोगका सचिव महेश्वर न्यौपाने तथा सचिवहरू केदारबहादुर अधिकारी र सूर्यप्रसाद गौतमको समेत गृहसचिवको लागि दौडधूप बढाएका छन् ।