नेपाली कांग्रेसको संसदीय दलले राष्ट्रियसभा सदस्य दुर्गाप्रसाद उपाध्यायको निधनप्रति दुःख व्यक्त गरेको छ । 

कांग्रेसका प्रमुख सचेतक बालकृष्ण खाण र राष्ट्रिय सभामा प्रमुख प्रतिपक्ष दलका नेता सुरेन्द्रराज पाण्डेले शुक्रवार छुट्टाछुट्टै विज्ञप्तिमार्फत उनको निधनप्रति दुःख व्यक्त गर्दै शोकसन्तप्त परिवारजनमा समवेदना प्रकट गरेका छन् ।

क्यान्सर रोगबाट पीडित सांसद उपाध्यायको ५१ वर्षको उमेरमा शुक्रवार निधन भएको हो । उनीहरूले सांसद उपाध्यायले नेपालको लोकतान्त्रिक आन्दोलन र पार्टीको संगठनमा सक्रिय योगदान पुर्‍याएको उल्लेख गर्दै उपाध्यायको निधनले राष्ट्र र कांग्रेसलाई अपूरणीय क्षति पुगेको बताएका छन् ।

विक्रम संवत् २०२६ सालमा जन्मिएका उपाध्याय २०४६ सालको जनआन्दोलनदेखि कांग्रेसमा सक्रिय रहँदै आएका थिए । विक्रम संवत् २०५४ सालको स्थानीय निर्वाचनमा रुपन्देहीको साबिक मधुवनी गाविसमा उनी उपाध्यक्ष पदमा निर्वाचित भएका थिए । 

कांग्रेसको १२ औं र १३ औं महाधिवेशनमा उपाध्याय २ कार्यकाल क्षेत्रीय सभापतिसमेत थिए । विक्रम संवत् २०७४ सालमा उनी कांग्रेसका तर्फबाट प्रदेश नम्बर ५ बाट राष्ट्रिय सभाको सदस्यमा निर्वाचित भएका थिए ।