भारतमा विपक्षी दलहरूले अमेरिकाका राष्ट्रपति डोनल्ड ट्रम्पको भव्य स्वागतमा भारत सरकारले १०० करोड भारु खर्च गरेकोमा गम्भीर प्रश्न उठाएका छन् । 

तर विशेषज्ञहरूले भारत र अमेरिका एक वैश्विक योजनामा काम गरिरहेको र १०० करोड भारु खर्च उपलब्धिमूलक भएको बताइरहेका छन् । 

अन्तर्राष्ट्रिय मामिलाका विज्ञ कमर आगाले भने, ‘कुनै पनि विदेशी राष्ट्रप्रमुखको स्वागत गर्दा पैसा बर्बाद भएको मान्नुहुँदैन । ट्रम्प संसारको सबभन्दा शक्तिशाली मुलुकका राष्ट्रपति हुन् । उनी भारत यात्रामा आउनु भनेको दुई देशबीच सम्बन्ध प्रगाढ भएको संकेत हो । दुई हजार अमेरिकी कम्पनीहरू भारतमा काम गरिरहेका छन् । भारतका पनि २०० कम्पनीहरू अमेरिकामा काम गरिरहेका छन् । भारत र अमेरिकाबीच १४२ अर्ब डलरको व्यापार हुने गरेको छ । त्यो व्यापार पनि भारतको पक्षमा छ ।’

अमेरिकासँग व्यापार सम्झौता नभएको विषयमा आगाले भने, ‘भारत र अमेरिकाबीच केही विषयमा सधैं मतभेद रहनेछन् । व्यापार सम्झौता नभएपनि केही कुरामा दुई देशबीच सधैं सहमति रहनेछ । आतंकवादनिरोधी अभियानमा भारत र अमेरिकाले ठूलो सहयोग आदानप्रदान गर्नेछन् । अनि अमेरिका र तालिबानबीच अफगानिस्तानका विषयमा ठूलो सम्झौता हुन लाग्दैछ । भारतलाई अफगानिस्तानको विषयमा चिन्ता छ । पाकिस्तान समर्थक तालिबानी आतंकवादी शान्ति सम्झौतापछि कश्मीरतिर आउलान् भनी भारत चिन्तित छ ।’

सूत्रहरूका अनुसार, अमेरिकाले भारतलाई अफगानिस्तानमा शान्तिसेना पठाउन दबाब दिइरहेको छ । तर भारत अमेरिकी दबाबमा पर्न नहुने आगाको भनाइ छ । सोभियत संघ र अमेरिकाले अफगानिस्तानमा भनेबमोजिमको काम गर्न नसकेको स्थितिमा भारत त्यसमा फस्न नहुने उनले बताए । 

उनले भने, ‘विश्वको नक्शामा अफगानिस्तान सामरिक रूपमा महत्त्वपूर्ण स्थानमा छ । अमेरिकाका लागि त्यो सधैं महत्त्वपूर्ण रहिरहनेछ । अमेरिकाले तालिबानसँग युद्ध नभई उसबाट सहायताको अपेक्षा गरिरहेको छ । खासमा अमेरिकाको उद्देश्य इरान र मध्य एसियामा प्रभाव जमाउन चाहेको छ । अमेरिका तालिबानको सहायताले इरानमाथि नियन्त्रण गर्न चाहन्छ । मध्य एसियाली देशहरू तुर्कमेनिस्तान, किर्गिजस्तान लगायतबाट ठूलो ग्यास पाइपलाइन अफगानिस्तान हुँदै अरब सागरसम्म ल्याउने अमेरिकाको योजना छ । ग्यास पाइपलाइनको सहायताले मध्य एसियाली देशहरूमा चीन र रुसको प्रभाव अन्त्य गर्ने अमेरिकाको योजना हो ।’

त्यसैले इरान र मध्य एसियामाथि प्रभावका लागि अमेरिकाले भारतको सहायता खोजिरहेको आगाको भनाइ छ । भारतीय जलसेनाले पश्चिम एसियादेखि दक्षिण पूर्वी एसियासम्मको सुरक्षाको जिम्मेवारी लिए हुन्थ्यो भन्ने अमेरिकाको चाहना छ । त्यसैले ट्रम्प भारतलाई अत्याधुनिक हेलिकप्टर बेच्न खोजिरहेको छ ।