२७ असार २०८३, शनिबार
निजी क्षेत्रमा काम गर्ने प्रत्येक व्यक्तिलाई कामको दबाबको राम्रो ज्ञान हुन्छ । टाइमलाइनमा बाँधिएर काम गर्नु, डेडलाइनभित्र काम सक्नु र अधिकतम राम्रो परिणाम दिन कोशिश गर्नुले तनाव दिन्छ । तर त्यसभन्दा पनि महत्त्वपूर्ण कुरा त, दिनमा आठ घन्टाभन्दा बढी काम गर्दा बिरामी परिन्छ ।
मनोवैज्ञानिकहरूका अनुसार, लामो शिफ्टमा काम गर्नेहरूलाई केही समयपछि एक्लोपनको भाव आउन थालछ । संवादहीनता तथा परिवार र साथीभाइसँग समय बिताउन नपाउँदा उनीहरू एक्लो अनुभव गर्छन् । उनीहरू समाजमा टाढिन पुग्छन् ।
एक मानिसले दिनमा कति घन्टा काम गर्नुपर्छ भन्ने विषयमा एक संस्थाले गरेको अनुसन्धानमा आठ घन्टा अधिकतम समय भएको देखाएको छ । तर कर्पोरेट सेक्टरमा कर्मचारीहरू त्यसभन्दा निकै बढी काम गरिरहेका हुन्छन् ।
त्यसैले कर्मचारीहरूमा तनाव र अवसाद व्यापक देखिन थालेको छ ।
युवा कर्मचारीहरूको व्यवहारका तीव्रताका साथ बढिरहेको नकारात्मकताको ठूलो कारण भनेकै उनीहरूको शारीरिक र मानसिक थकान हो । उनीहरूसँग व्यायामका लागि समेत समय हुँदैन र कार्यालय समय सकिएपछि ऊर्जा पनि बच्दैन ।
अनि उनीहरू बिस्तारै आफैंमा मात्र सीमित हुन थाल्छन् । मनका कुरा र दिमागका पीडा कसैसँग शेयर गर्न नपाउँदा उनीहरूमा इरिटेसन बढ्न थाल्छ । त्यसले उनीहरूको तनावलाई थप बढाउँछ ।
विशेषगरी निजी क्षेत्रमा काम गर्ने युवाहरूमा करीयर ग्रोथ र आफूलाई साबित गर्ने अत्यधिक दबाब हुन्छ । उनीहरू चाहेर पनि आफ्ना सोखका लागि समय निकाल्न पाउँदैनन् । उनीहरूले आफूलाई सर्वोत्तम साबित गर्नका लागि पनि समयभन्दा बढी काम गरिरहेका छन् ।
